Тений февраль гыч спецоперацийыште лийше ветеран ден участник-влакым кундемыштына лӱмынак туныктымо «Герои Марий Эл. Талешке-влак» кадровый программе пашам ышта. Тудын почеш СВО-н ветеранже ден участникше-влакын квалификацийыштым нӧлташ полшат.
Программыш ушнен кертыт:
- СВО-н ветеранже, участникше але боевой действийлаште лийше-влак,
- регистраций почеш Марий Элыште илыше але илаш толшо,
- кӱшыл шинчымашан еҥ,
- вуйлатымаште опытан еҥ.
«Марий Элын Геройжо-влак» программын шонымашыже – кӱкшӧ квалификациян специалист-влакым ямдылаш да Марий Элыштак паша верым ышташ.
«Марий Элын Геройжо-влак» программын йыжыҥже-влак:
- 2025 ий 10 март гыч 18 апрель марте регистрироватлалтман. Тидлан участник «Россия – страна возможностей» платформышто Личный кабинетшым ыштышаш, тыгак анкетысе йодыш-влаклан вашештышаш да эссем возышаш.
- Апрель-майыште сайтыште онлайн-тестированийым эртыман. Тестированийын сессийже чыла регистрироватлалтше участниклан палемдыме срокышто 72 шагат шуйна. Тушко Личный кабинет гоч пурыман. Тестированийыште увер-влакым умылымым, нуным илышыште кучылт моштымым, вуйлатымаште вий-куат, шот-радам улмо аклалтеш. Анкетым да тестированийым эртымеке, рейтинг ышталтеш, тудын почеш вес йыжыҥыш куснаш йӧн лиеш.
- Май-июньышто – индивидуальный собеседований. Конкурс почеш ойырен налме мероприятийым (анкетым, эссем, тестирований ден собеседованийым) регионысо эксперт-влак аклат. Кызытсе жаплан региональный кадровый программын эксперт тӱшкажым ыштыме. Тушко Марий Элым Вуйлатышын Администрацийжын еҥже да кундемысе практик-психолог-шамыч пурталтыныт. Эксперт-влак РАНХиГС-ын Кугыжаныш управленийжын кӱшыл школыштыжо лӱмынак тунемыныт. Тыгак нуно программысе участник-влакын данныйыштым, кандидат-влакым аклыме методикым тӱжваке лукташ огыл кидпалым шынденыт.
- 30 июнь марте результатым тергат, иктешлат, анализым ыштат.
- 2025 ий сентябрь гыч 2026 ий сентябрь марте образовательный программе почеш тунемыт. Тиде программыш ныл очный модуль ден межмодульный тунеммашым пуртымо. Ты жапыште участник-шамыч электрон образовательный ресурс дене пайдаланат, наставник дене пашам ыштат, стажировкым эртат, культурно-массовый, спортивный, тазалыкым пеҥгыдемдыме мероприятий-влакым эртарат. Тыгак программыш логалше еҥлан личностно-профессиональный диагностике ышталтеш.
Тунемме деч вара программын участникшылан профессиональный переподготовко шотышто диплом пуалтеш. Нине еҥ-влак Марий Эл Республикысе кугыжаныш органлаште, верысе самоуправлений органлаште, тыгак регионысо организацийлаште пашам ышташ шинчымашым налыт да опытым погат.
Программыш ушнаш шонышо СВО ветеран ден участниклан йодмашым герои-марий-эл.рф сайтыште колтыман да шке нерген чын данныйым ончыктыман.
Апрель тӱҥалтыш марте ты программыш 161 еҥ ушнен.
Волжский район гыч Альфред Нурмухаметов «Время Героев» федеральный программым эртен. Кызыт тудо Упшер ял шотан илем администрацийым вуйлата да, регионысо проектыш ушнен, умбакыжат тунемаш шона.