Россий УФСИН-ын Марий Элысе управленийжын «Ястреб» спецподразделенийжын боецше Самара олаште эртаралтше профессиональный мастарлык конкурсын округысо этапыштыже эн сай результатым ончыктен.
Юл кундем федерал округ гыч 14 еҥ «Мангуст» базыште вийжым терген. Марий Элысе пӧлкан боецше Александр К. чыла этапыште ончылно лийын. Мутлан, вич меҥге кужытан кроссым 16 минутат 37 секундышто куржын. Тылеч посна Александр – регионышто эртарыме ведомствын чемпионатыштыже да всероссийский первенствыште эре ончылно.