Марий Элым Вуйлатыше Юрий Зайцев, республикыштына илыше-влакым регионысо увер-влак дене вашкерак палдараш манын, МАХ российысе мессенджерыште шке каналжым вӱдаш тӱҥалын, увертара «Марийская правда» газет (https://www.marpravda.ru/news/sociym/glava-mariy-el-yuriy-zaytsev-zapustil-kanal-v-messendzhere-max/).
Тыгак у площадкыште республикым Вуйлатыше кӱлешан решений-влак да мероприятий-шамычын анонсышт дене палымым ышта.
МАХ – Российысе ятыр сервисан цифровой платформо. Тушто мессенджер гоч мутланаш, йыҥгырташ, икте-весылан йӱк сообщенийым да кугу файл-влакым колтедаш лиеш. Тыгак платформышто оксам колташ йӧн уло. У соцкылыште мини-приложений да чат-бот сынан бизнес-сервис-влак улыт, нуно калыклан полшат. Юрий Зайцев мессенджерын пайдале улмыжым палемда.
«МАХ мессенджерым телефонышкыда вераҥдыза да мыйын каналышкем ушныза», – возен Юрий Зайцев.
Тудын шонымыж почеш, сервис пеш йӧнан, туддене пайдаланаш куштылго, видеофайл-влак сайын почылтыт. Тыгак мессенджерыште Марий Эл Республикысе Правительствынат каналже уло.