Марий Эл Республикыште «За Марий Эл» поро кумылым ончыктымо фонд почылтын. Тудым Российысе общественный палатын еҥже, Россий МВД-н Марий Элысе управленийжын общественный советшын председательже Роман Золотухин вуйлата. Фонд СВО-ш гуманитарный полышым колтымо сомылым иктыш ушаш йӧным ышта.
– Мобилизаций тӱҥалмеке, СВО-што улшо боец-шамычлан полшаш тӱҥалынна. Тышке республикысе Правительстве, муниципалитет-влак, федеральный да регионысо кучем-влакын органышт ты пашаш ушненыт. Ик совещаний годым военно-шефский да гуманитарный полышым пуымо шотышто единый координационный рӱдерым ыштыме нерген идейым темленам. Тыге «За Марий Эл» фонд шочын, – каласкала Р.Золотухин.
Порылыкым ончыктымо фондын попечительский советыштыже – Марий Эл Правительстве Вуйлатышын алмаштышыже С.А.Воронцов, элгӧргӧ политике министрын алмаштышыже В.В.Викторов, Экономикым вияҥдымаш министерствыште экономикым радамлыме шотышто кугыжаныш пӧлкам вуйлатыше М.И.Карташов.
Фондын офисше Йошкар-Ола, Свердлов уремысе 49а номеран пӧрт адрес дене верланен. Гуманитарный полышым шупшыкташ КамАЗ-ым, грузым ужатен каяш эше ик машинам ойыреныт. Тылеч ончыч Марий Эл гыч СВО-ш 40 кече еда полышым наҥгаеныт гын, ынде тылзеш кок гана тидым ышташ тӱҥалыт – кажне кокымшо да нылымше кугарнян.
– Гуманитарный полышым наҥгайыме годым шкежат, грузым ужатен, СВО кайыме верыш ятыр гана миенам. Садлан кузе тушко кудалман, командир-влак дене кузе кылым ыштыман, пропускым эртыман да молымат сайын палем. Мутлан, боец-влаклан республикнан иктаж районышто арверым, кочкышым, ӱзгарым погеныт, ик машинаш оптеныт да военный операций кайыме верыш шке кудалаш шонен пыштеныт. Тиде моткоч лӱдыкшӧ. Лишыл еҥым ужмо амал дене тушко каяш кумыл уло гын, ужатен кайыше машина дене мияш йӧн уло. Но тиддеч ончыч кутырен келшыман, лекше йодыш-влакым рашемдыман, – манеш фондым вуйлатыше.
СВО-што улшо боец-влаклан полшымо сомылыш ушнаш кумылан еҥ-влак, 89677576078 номеран телефон дене йыҥгыртен але «За Марий Эл» фондын офисышкыже (Йошкар-Ола, Свердлов урем, 49а номеран пӧрт) толын, лекше йодышым рашемден кертыт. Поро пашаш теат ушныза.
Р.Золотухинын альбомжо гыч налме фото.