Российысе регионлаште молодёжный политикым комплексно вияҥдыме «Регион для молодых» программе конкурсышто Марий Эл сеҥыше радамыш логалын.
Программе почеш «Авангард» рӱдерыште у инфраструктурым да молодёжь дене пашам ышташ площадке-влакым ышташ федеральный бюджет гыч 97,7 млн теҥге колталтеш. Тыгак «10 граней патриотизма» мероприятий эртаралтеш.
Марий кундем «Регион для молодых» федеральный конкурсышто кумшо гана сеҥен. 2023 ийыште молодёжный политикым саемдаш 122,4 млн теҥгаш субсидийым налын, 2024 ийыште – 95 млн теҥгем, а 2025 ийыште 97,7 млн теҥге толеш.
Молодёжный политике – Марий Эл Правительствын ик эн ончыч шуктымо пашаже. Кундемна доброволец ден юнармий толкынлам вияҥдыме, паша верым кычалаш полшымо, таза илыш-йӱлалан кумылаҥдыме шотышто ончылно кая. Кодшо ийын самырык учёный, шымлызе да инноватор-влаклан тыгак республикыште молодёжный пространствым ыштымылан да вияҥдымылан Марий Эл Республикым Вуйлатышын грантым пуаш тӱҥалме. Патриотический толкын чолган вияҥеш. Регион юнаармеец-влакын вузыш пурен кертмышт дене Российысе 10 эн сай субъект радамыш пура.
Самырык-влакын чолга да инициативан улмыштым федеральный кӱкшытыштат аклат. Кажне ийын 400 утла самырык еҥ «Территория смыслов», «Таврида», «Машук», «iВолга» форум ден фестивальлашке ушна.