Пытартыш ийлаште шке элысе кочкыш сатулан йодмаш кугеммылан кӧра Марий Элыште вольык продукцийым 70%-лан шукырак ыштыме. Тидыже шыл да шӧр-торык кочкышым ыштен налме сомыл сайын вияҥме нерген ойла.
Марийстат палдара: январь-апрель тылзылаште вольыкым да кайыкым шыллан (илышынек шотлымаште) 117, 9 тӱжем тонным (2020 ийысе дене таҥастарымаште 104, 0%) колтымо, 59,3 тӱжем тонн шӧрым лӱштен налме (104,6 %), 131,3 млн. муным погымо (115,8%).
Вольык озанлык продукцийым ыштен налмаште кугу верым ялозанлык организаций-влак налын шогат. Кугу верым кайык шыл – 73,2% – налеш. Ончылно Параньга (26,6%), Советский (21,1%) да Медведево (19,1%) районла улыт.
Шӧрым лӱштен налме денат тений ончылнырак улына: 42,2 тӱжем тонн, 2020 ий дене таҥастарымаште тиде 5,2%-лан шукырак. Шӧр лектыш дене икымше радамыште У Торъял (ик ушкал деч 3131 килограммым лӱштымӧ) да Медведево (2924 кг) районласе озанлык-влак улыт.
Валентина Семёнова.