Тӱвыра министерствыште коллегийын да Мер каҥашын чумыр заседанийже эртаралтын

Фотом mincult12.ru сайт гыч налме.

17 майыште Марий Эл Республикын тӱвыра министерствыштыже коллегийын да Мер каҥашын чумыр заседанийже эртаралтын

Совещанийын участникше-влак отрасльын кызытсе жаплан кӱлешан йодыш-влакым  онченыт. Тӱвыра, печать да калык-влакын пашашт шотышто министр Константин Иванов  республикыште 2021 ий мучаш марте тӱвыра аланыште  эртаралтше кӱлешан мероприятий-влак нерген каласкален.

Министрын алмаштышыже Михаил Матвеев регионышто «Культура» национальный проектым илышыш пуртымо нерген палдарен. Тудо Марий кугыжаныш филармонийлан полатым чоҥымо пашам  тӱҥлан шотла.

Паша республикын рӱдӧ олаштыже веле огыл ышталтеш: Волжский, Шернур да Советский районлаште ялысе тӱвыра учреждений-влакым тичмашын олмыктымаш але реконструкций паша ышталтеш.  Тиде ийын йоча сымыктыш школ-влакым уэмдыме шотышто кампаний тӱҥалын. Марий Элыште Кужеҥер, Морко, Советский йоча сымыктыш школла, тыгак Юрино поселкышто Н.В. Макарова лӱмеш сымыктыш школ олмыкташлан черетыште шогат.

«Уста еҥ-влак» лӱман проект кышкарышке пурышо мероприятий-влакым кок направлений дене илышыш шыҥдараш тӱҥалме: «Ялысе эн сай тӱвыра учрежденийлан кугыжаныш полышым пуымо» да «Ялысе тӱвыра учреждений-влакын эн сай пашаеҥыштлан кугыжаныш полышым пуымо». Калык усталык  да тӱвыра пашам  шуктышо республикысе научно-методический рӱдер келыштарыше конкурсым эртарен колтен. 25 мартыште конкурсышто сеҥыше-влаклан окса сертификатым кучыктымо», — палемдыш Михаил Матвеев.

2019 ийыштак «Культура» нацпроектым илышыш шыҥдарымаште виртуальный концерт зал-влакым почаш тӱҥалме: Козьмодемянскыште Я.Эшпай лӱмеш калык тӱвыра рӱдерыште почмо, тений залым Э.Сапаев лӱмеш опер да балет театырыште ыштат. С.Г. Чавайн лӱмеш калыкле книгагудо книга памятниклан шотлалтше документлам цифровой форматыш кусарыме пашажым умбакыже шуя.

Валентина Семёнова.