Марий Эл вуйлатыше Юрий Зайцевын 7 ноябрьыште лекше Указше лекмеке, тиде арнян республикыштына у вуйлатыше-влак пале лийыч. Сентябрьыште эртыше сайлымаш деч вара нуно чыланат шке должностьыштышт «пашам жаплан шуктышо» лийыныт.
Марий Эл правительстве вуйлатышын кок икымше алмаштышыже уло. Ты должностьыш ойырымо еҥ-влак коктынат марий улыт. Евгений Кузьмин ты пашам тений июнь гыч ышташ тӱҥалын. Михаил Васютин должностьышто тылеч ончычат ыштен.
Марий Эл правительстве вуйлатышын кок алмаштышыжат нунак кодыныт: Степан Воронцов ден Александр Сальников. Коктынат республик гыч улыт, иктыже марий. Эше ик алмаштыше – Дмитрий Троицкий. Тудо шкеже Пятигорск олаште шочын, экономике пашаште виян, маныт, Юрий Зайцев дене пырля ончычат ыштен.
Юрий Викторович Марий Эл Вуйлатышын администрацийыжым вуйлаташ Иветта Тхакаховалан ӱшанен. Тудат мемнан республикыш Ю.Зайцев дене пырля толын.
Министр-влак шотышто ойлаш гын, кызытеш ончычат тиде пашамак шуктышо-влакын лӱмышт гына пале. Моло министерстве вуйлатыше-влак вашталтыт, очыни.
✓Тӱвыра, печать да калык-влакын пашашт шотышто министрлан Константин Иванов умбакыже шке пашажым шукташ тӱҥалеш.
✓Ялозанлык да продовольствий министрлан Андрей Кондратенко кодын.
✓Транспорт да корно озанлык министрлан – Александр Герасименко.
✓Кугыжаныш пого министрлан – Алексей Плотников.
Чумыр составым пален налде, иктешлен каласаш эше неле. Но тӱҥалтыш сай манме шуэш, правительствыште ончычсо дене таҥастарымаште марий-влак ешаралтыныт, шукышт шкенан республик гычак улыт. Тидын шотышто республик вуйлатыше чын ошкылым ыштен манын шонена, у правительстве еҥ-влакын шочмо кундемыштына илышым саемдаш вийын тыршаш тӱҥалмылан ӱшанена.