18 октябрьыште кӱшыл шинчымашым налше-влак коклаште «Идалыкын студентше» Российысе премийын регионысо йыжыҥже эртаралтын. Ташкент олаште шочын-кушшо, МарГУ-што общий да профессиональный образований факультетыште магистратурышто кокымшо ий тунемше Ахмед Аширов кумшо гана тыгай конкурсыш ушна. Тудо мурым воза, пашаже-влакым интернет кумдыкыш луктеш да тӱрлӧ конкурсышто ойыртемалтеш.
Экологлан тунемын
Ахмед кум шочшан ешыште шочын-кушкын. Аваже – медсестра, ачаже – архитектор. Аважын темлымыж почеш Ахмед Марий Элышке шинчымашым налаш толын.
– Пӱртӱсым йӧратем, тудо мыланем куатым пуа. Пытартыш жапыште тӱня яндар тӱсшым йомдараш тӱҥалын. Айдеме шкеак тудым лавырта. Сандене, шке ӱмбак изи ответственностьым налаш манын, экологлан тунемаш пурышым. Но ӱмаште магистратурышто тиде направлений лийын огыл, сандене «Консалтинг в профессиональном образовании» профессий дене тунемаш тӱҥальым. Тудо вуйлатыме паша дене кылдалтын, – мане А.Аширов.
Усталык пашаш ушнен
Ахмед – усталык шӱлышан, мураш йӧратыше рвезе. Эше подростко улмыж годым тудо мурызо лияш шонен. Но калык коклашке лекташ тоштын огыл. Чылажат вузышто тӱҥалын. Тыште усталыкшым, вокал мастарлыкшым нӧлтен толын.
Тений 6 октябрьыште интернетыште «Kevlari» псевдоним дене «Фиолетовый закат» муро альбомжо лектын. Тудын мурыжо-влакым ынде интернетысе чыла цифровой платформышто муаш да колышташ лиеш.
– Кудымшо ий мурем. Вузыштак тыгак ешартыш музыкальный шинчымашым налам. Палантай лӱмеш колледжыште туныктышо Людмила Владимировна Микушкиналан поснак кугу таум ойлем. Тиде педагог дене вокал шотышто заниматлем. Мыланем кокымшо ава гай, тудлан кӧра шукылан тунемынам.
«Kevlari» проектым ныл ий ончыч, коронавирус жапыште, возаш тӱҥалынам. Молан тыгай лӱмым пуэнам? Индийыште тыгай ола уло. Медучреждений-влакын ситыдымыштлан кӧра коронавирус жапыште тушто шуко еҥ колен. Сандене усталык пашам Kevlari лӱм дене кылденам. Кумдан палыме мурызо лиям гын, ты олалан полшаш шонем.
Мурым йолташ рвезе, МарГУ-н выпускникше Андрей Иванов дене пырля возена. Шомакым мый серем, семым коктын келыштарена, варажым Андрей шкеак аранжировкым ышта. Муро-влак йӧратымаш, келшымаш теме-влакым почын пуат. Кызытеш 15 наре композицийым лукмо. Иктыжым верысе мурызо Ида Топорова дене пырля ыштыме, – мане тудо.
Ий еда нӧлтен толмо мастарлыкшым, моштымашыжым Ахмед Аширов тӱнямбалысе, Российысе вокал конкурслаште терген да шуко гана Гран-прим налын. Ӱмаште тудо эше Звенигово олаште икымше гана сольный концертым ончыктен.
Кодшо шошым Самара олаште эртаралтше «Российысе студенческий шошо – 2022» конкурсышто ойыртемалтын. «Авторский муро» номинацийыште «Удали» муро композицийым жюрилан аклаш луктын. Тыгак тудо «Опора республики-2022» премийын «Эн сай йот студент» номинацийыштыже сеҥышыш лектын.
«Идалыкын студентше» Российысе премийын регионысо йыжыҥже Йошкар-Олаште самырык-влакын полатыштышт эртаралтын. Ахмед Аширов тушто «Творческая личность года» номинацийыште шкенжым терген. Чылаже куд участник погынен. Нуно шкешт нерген презентацийым ончыктеныт, сеҥымашышт дене палдареныт. А.Аширов авторский проектше дене палымым ыштен да видеош войзымо композицийжым ончыктен. Рвезын мутшо почеш, сеҥыше-влакым октябрь мучаште палдарат.
Кеҥеж канышлан – Узбекистаныш
А.Ашировын ачаже – турко, аваже – туркменке. Ешге Узбекистан кундемыште илат, сандене рвезылан тысе калыкын тӱвыраже, йӱлаже палыме. Шочмо кундемысе мотор вер чонжым куандара. Кажне кеҥежлан Ахмед шочмо кундемышкыже миен толеш.
– Узбекистан Рӱдӧ Азийыште ик эн тошто регионлан шотлалтеш. Ташкент олаште эн мотор достопримечательность-влак улыт. Мутлан, «Минор» ош мечеть, «Чорсу» ик эн тошто рынке, «Амира Тимура» площадь.
Тыште ислам верам кучат. Ик эн тӱҥ пайрем – Навруз. Национальный кочкыш гыч поснак пловым, казан кебаб (шорык шыл гыч ыштыме пареҥге), нарын кочкышым палемдыман, – каласыш рвезе.
Тынар ий жапыште А.Аширов Марий кундемлан тунем шуын, тыште еҥ-влакат поро да тыматле улыт, мане. Йошкар-Оласе Брюгге набережный тудлан поснак келша.
Марий Эл Ахмед Ашировын талантшым почаш полшен, кугу сценыш лекташ корным ончыктен. Кунам-гынат тудо лӱмлӧ мурызо лиеш манын, ӱшан уло.