Марий Эл регион-влак кокласе профессионал мастарлык национальный рейтингыште шымше верым айла.
Ты рейтинглан кӧра Российысе туризмын лидерже-влакым палемдат. Тушто субъект-шамычын 25 тӱрлӧ туристический конкурсышто участвоватлымыштым ончат. Тидыжым инфраструктурым ямдылымаште, унам ончен моштымаште, турист-шамычлан йӧным келыштарымаште палемдат. Элнан лу эн сай кундемж радамыште лияш – кугу чап. Тыгай кӱкшытыш Марий Элысе туризмым вияҥдымашке надырым пыштыше командылан кӧра шумо. Тидланже регионысо Правительстват тӱрлӧ полышым пуаш тырша. Кундемыштына туризмым вияҥдыме дене регионыш толшо инвестицийым кугемдаш йӧн ышталтеш.