21 майыште Озаҥ олаште регион-влак дене кылым ыштыме шотышто советын V заседанийже «Волга – Янцзы» формат дене эртаралтын.
Заседанийыште Президентын Юл кундем федеральный округышто полпредше Игорь Комаров Китай Калык Ркспублик дене кылым ыштымаште кӱкшытыш шумо да «Волга – Янцзы» форматлан келшышын, пырля вияҥме у йӧн-влак нерген каласкален.
Регион-влак дене кылым ыштыме шотышто советыште Российысе Юл эҥер воктене верланыше 14 субъектым да Китайысе 6 регионым вуйлатыше-влак лийыныт.
Ю.Зайцевын палемдымыж почеш, Китай ден Марий Эл коклаште кылым пеҥгыдемдымаште да сбыт рынкым кумдаҥдымаште кугу потенциал уло. Ялозанлык да промышленный предприятийлаште ыштен лукмо сатум ты элыш шупшыктымаште контрактым ыштыме шотышто йодыш-влак рашемдалтыт. Туризм отрасльым вияҥдымаштат шуко паша ышталтеш.
Марий Эл да Китай Калык Республик дене гуманитарный сферыштат кылым пеҥгыдемдат. Республикна да ты эл дене внешнеторговый оборот 2024 ийыште тичмаш кугытын 26,3%-ышкыже шуын. Экспортын кугурак ужашыже (63%) – пу але моло ярыман целлюлоз материал, тыгак кагаз але картон гыч ямдылыме тӱрло арвер, шыл да кочкыш сату – 17% наре.
Китай гыч шупшыктымо сатун кугурак ужашыже (44% наре) – оборудований да механический устройство-влак, шергакан огыл метал гыч ямдылыме арвер-влак (17% наре), пластмассе да тудын гыч ямдылыме тӱрлӧ арвер (9% наре).
Тыгак туныктымо программе-влакым ямдылымаште, студент ден преподаватель-влакын академический алмашталтмышт шотышто направленийла дене мероприятий-влакым эртарат. Туризм аланыштат проект-влакым пырля илышыш пуртымо шотышто йӧн шуко, тӱвыра аланыштат – тыгак.
Марий Элым Вуйлатышын пресс-службыжын фотожо.