12-17 мартыште Коми Республикысе Сыктывдинский районысо «Гренада» базыште спортивный туризмын ече дене куржталмаште Российын чемпионатше эртен. Тушко элнан 12 регионжо гыч спортсмен-влак ушненыт. Ты гана чемпионатыште Российын 33 спорт мастерже ӱчашен, тыгак спорт мастерыш кандидат да профессионал-влак лийыныт.
Спортсмен-влак кум кече тӱрлӧ дистанцийыште куржталыныт. Марий Элын командыже 2628 баллым поген да икымше верыш лектын. Кундемнан сборный командыжын спортсменкыже Ксения Мубаракшина кумло кокымшо гана элнан чемпионкыжо лийын. Пӧръеҥ-влак коклаште Константин Рожков кокымшо финишыш пурен. Мария Петренко ик кечыште кок тӱрлӧ дистанцийыште Россий спорт мастерыш нормативым шуктен.
Ты гана чемпионатыште сеҥыше-влаклан чемпионын значокшым пижыктеныт. К.Мубаракшинам, Е.Николаевам, М.Петровам да А.Марковам тыгай значок дене палемденыт.
Марий Элысе Спорт да туризм министерствын сайтше гыч налме фото.