Россий Правительстве Председательын алмаштышыже Марат Хуснуллин регионласе вуйлатыше-влаклан видеорежим йӧн дене заседанийым эртарен. Тушто национальный ден федеральный проект-влакым кузе илышыш пуртымо шотышто ончен лекме. Заседанийыш Марий Элым вуйлатыше Александр Евстифеев ушнен.
Россий Правительствын палемдымыж почеш, 11 апрельлан Марий Эл Республик «Комплексное развитие сельских территорий» программе почеш икымше верым, корным ыштыме шотышто нылымше верым, «Оздоровление Волги» федеральный проектым илышыш шыҥдарыме шотышто индешымше верым налеш.
«Оздоровление Волги» проект почеш тений Марий Элыште кок объектым, канализацийын эрыктыме сооруженийжым ыштышаш улыт. Тидлан федеральный бюджет 217 млн теҥгем ойырен.
«Региональная и местная дорожная сеть» регионысо проект почеш тений 50 объектыште, 2023 ийыште 55 объектыште корным ышташ палемдыме. Федеральный программе почеш тидлан 4981,4 млн теҥге ойыралтеш.