Сочиште кызытсе журналист-влакын «Вся Россия-2022» XXVI форумышт 22 гыч 28 сентябрь марте эрта.
Тушко Российысе газет да моло изданийлаште, телевидений, радиопашаште тыршыше 1000 утла еҥ погынен. Нунын коклаштак Индий, Сербий элла гыч, Донецк калык Республик да Херсон область гыч делегат-влак улыт.
Икымше кечын Краснодар крайлан 85 ий темме лӱмеш мероприятий-влак, «Как закалялась Кубань» фотовыставке лийын.
Донбасс теме посна верым налеш: форум жапыште ончыктымо кино, фоторепортаж — чылажат тачысе илышым журналист-влакын ончалтышышт гоч почын пуаш полшат.
СМИ пашаеҥ-влаклан пеш шуко семинар, мастер-класс, эксперт-влак дене вашлиймаш, «йыргешке ӱстел» эртат.
Форумышто тыгак Россий журналист ушемын эртарыме конкурсышто сеҥыше-влакым саламлат. Марий Эл гыч сеҥыше коклашке МЭТР телеканалын журналистше Мария Шавкунова «Рубец» документальный фильмже дене лектын. Тудын деч посна форумышто Тӱвыра, печать да калык-влакын пашашт шотышто министрын алмаштышыже Михаил Матвеев, Советский районын «Вестник района» газет редакций гыч Вера Кабирова да мый (министерстве тений кум еҥлан миен толаш йӧным ыштен) улына. Делегацийым вуйлатыше семын — Россий журналист ушемын Марий кундемысе пӧлкажым вуйлатыше Оксана Старикова.
