Набережные Челны олаште «Медград» медклинике эн кугулан шотлалтеш. Тудо 2015 ийыште почылтын. Кызыт тушто визымше гана вуйлатыше вашталтеш.
Ты гана Марий Эл гыч Валерий Баширов гендиректорынсомылжым шукташ тӱҥалеш. Ончыч ты должностьышто Муслим Гилев, Татьяна Чистякова, Наиль Агишев да Дмитрий Измайлов лийыныт, – https://chelny-biz.ru сайт увертара.
Валерий Ильязович спорт медицинын врачше, хирург. Шке жапыштыже тудо «Сосновый бор» санаторийыште тӱҥ врачлан ыштен. Футбол дене профессионально модын. 2020 ийыште «Лидеры России. Здравоохранение» АНО «Россия – страна возможностей» конкурсын полуфиналышкыже лектын.
