«Российын миссше–2023» калыкле конкурсышто Марий Элын чапшым аралыше Анастасия Антонова лу эн мотор ӱдыр-влак коклаш логалын.
Конкурсыш 85 тӱжем йодмаш пурен. Икымше йыжыҥ онлайн йӧн дене эртен. Тушко 100 ӱдыр лектын. Кокымшо йыжыҥ деч вара 50 ӱдырым финалыш ойыреныт, нунын коклаште Анастасия лийын. Ончышо-влакын йӱклымышт почеш А.Антонова 20 эн-эн-влак радамыш пурен. Тушто ӱдыр куд тӱжем утла йӱкым поген. Жюри да эксперт-влак Анастасиям элнан лу эн мотор ӱдыржӧ-влак радамыш ойыреныт. Палемдыман, конкурс кышкарыште эртаралтше «Национальный костюм» конкурсышто Антонова сеҥышыш лектын. Тудо марий вургемым ончыктен, Марий Эл нерген видеопрезентацийым ямдылен. Жюри ӱдырын пашажым кӱкшын аклен.
А.Антонова Йошкар-Оласе 9-ше номеран школышто 1-9-ше класслам, 10-11-ше класслам – 4-ше номеран гимназийыште тунемын. Школ деч вара Озаҥ оласе университетын правам аралыме орган-влакын таможенный пӧлкашкыже тунемаш пурен. Пел ий очно шинчымашым налмеке, заочный отделенийыш кусаралтын. Ты жапыштак бортпроводник-влак курсышто шинчымашым нӧлтен. Кум тылзе тунеммеке, чоҥештылаш тӱҥалын.
Анастасия изинек чолга койышан, чыла вере шуаш тыршыше кушкын. Чылажат тудлан куштылгын пуалтын, но ӱдырым хореографий сымыстарен. Музыкальный школын хореографий классшым йошкар диплом дене пытарен. Тушто тудо классический, калыкле, современный куштымаш-влакым тунемын. Ӱдырын ойлымыж почеш, калыкле куштымаш-влак чонжылан поснак лишыл улыт. Конкурс годымат национальный костюмым презентоватлыме годым марий куштымашым ончыктен.
Такшым «Российын миссше» конкурсыш Анастасиям эше 2019 ийыштак ӱжыныт. Но тунам ӱдыр чоҥештылаш веле тӱҥалын, садлан конкурслан тореш лийын. Конкурсышто 23 ияш марте ӱдыр-влак участвоватлен кертыт. Тидыже ик эн тӱҥ условийлан шотлалтеш. Анастасия кызыт 23 ияш, садлан тений тушто шкенжым терген ончашак шонен.
Элнан 50 эн мотор ӱдыржӧ-влак кум арня конкурсын финалжылан ямдылалтыныт. Нуно Моско областьысе ик отельыште иленыт. Кажне кечын профессионал-влак дене мастарлыкыштым шуареныт. Моторлык шотышто мастер-класс, актёр мастарлыкым шуарымаш, дефиле да моло йыжыҥлаштат усталыкыштым тергеныт. Элнан лӱмлӧ педагогышт дене моштымашыштым таптеныт. Конкурс шотышто ӱдыр тыгерак каласкалыш:
– Очыни, ик кастинг гыч вес кастинг марте эртыме жапым эн нелылан шотлыман. Тыгодым тый от пале, эртенат але уке, могай вашмутым вучыман, иктаж пашам тӱҥалашат ӧрмашан. Кокымшо кастингыш логалмем нерген мыланем вич кече ончыч увертареныт. Ты жапыште мыланем марий калыкын вургемжым, куштымашыжым ямдылаш, видеопрезентацийым ыштен шукташ кӱлын. Ты конкурс кум йыжыҥ дене эртен. Эн ончыч жюри ден организатор-влаклан шке кундемна дене палдарыше пӧлекым ончыктенна. Вара национальный вургем нерген каласкаленна. Кумшылан кундемна нерген палдарыше презентацийым ончыктыман ыле, но ме видеопрезентацийым ямдыленна. Молан манаш гын мотор Марий кундемым ончыктымак шуын. Тӱҥ шотышто организатор да участник-влакым мемнан кундемыш толын каяш кумылаҥдынем ыле.
Моторлык конкурсышто национальный вургемым кӱкшын ончыктымаште, мыланем Йошкар-Оласе администраций, ешем да йолташем-влак полшеныт. Нунылан кугу таум ойлем! Ме Марий Элын вий-куатшым, калыкын икоян улмыжым, йӱлам шуктымыжым да тӱвырам аралымыжым ончыктен сеҥенна.
«Конкурс деч вара шканет иктаж-могай иктешлымашым ыштенат мо?» – йодым А.Антонова деч. Вашмут тыгайрак лие:
– Тыгай кӱкшытан конкурсышто таҥасаш моторлык дене веле от серлаге. Тидлан тыгак ответственность, чытыш, вий, пеҥгыдылык, лӱддымылык кӱлыт. Ме ӱдыр-влак, пушкыдо кумылан улына, койыш-шоктышнат лушкыдырак. Элнан эн мотор ӱдыржӧ-влак коклашке логалынат гын, шкем кученат моштыман. Тӱҥ шотышто кажне участник дене кумылын мутланыман, чоным почман, икте-весылан кӧраныман огыл. Шоналташ веле – ты конкурсыш кугу элнан тӱрлӧ кундемже гыч 100 «энжым» ойыреныт. Садлан тушко логалмымат моткоч кугу кӱкшытлан шотлем. А тӱрлӧ олала гыч мотор ӱдыр-влак дене палыме лиймылан эшеат йывыртенам. Ынде кажне олаште мыйын эн мотор гид-экскурсоводем уло.
Конкурс мыланем тыгак хейтым (еҥ пашажлан келшыдымым, мыскылымым ончыктымаш) сеҥаш полшен манын, пеҥгыдын каласен кертам. Тыйын нерген ойлат гын, ончылно улат, илет, иктаж-мом ыштет. Тидыжак, очыни, нуным кӱлеш-оккӱлым ойлаш тарата. Садлан, чон йодеш гын, ыштыманак, еҥ-влакын манеш-манешыштым колыштман огыл.
Россий кӱкшытан моторлык конкурсышто Марий Эл икымше гана участвоватлен, вигак лу эн моторжо-влак коклашке логалын. «Российын миссше–2023» лӱмым Санкт-Петербург ола гыч Маргарита Голубева сулен. «Российын икымше вице-миссше» лӱмым Тольятти ола гыч Елизавета Дудина налын. «Кокымшо вице-мисс» Саха Республик гыч Любовь Хохолова лийын.
Анастасия Антонова дене ме кугешнена! Тек тудын усталыкше, моторлыкшо, кумылжо эреак ончылно лийыт да шуко сеҥымашым кондат!
Ӱдырын альбомжо гыч налме фото.