
Медведево район Шойбулак селаште илыше кум шочшан ача 39 ияш Станислав Коротков «Илыза, пацан-влак» шомак дене спецоперацийысе тале кредалмаш годым вуйжым пыштен.
Шукерте огыл писатель Захар Прилепинын СВО участник-влаклан пӧлеклалтше кумшо книгаштыже СВО-што вуйым пыштыше «Зима» позывноян Станислав Коротковын Наталья пелашыжын шарнымашыже тыгаяк лӱм дене савыкталтын. Кумшо савыктыш «Честь наивысшая – носить русский мундир» маналтеш.
Станислав Луганск областьыште Александр Матросовын подвигшым ыштен. Беспилотник чоҥештен толмо годым гранатым кудалтеныт. А марий сарзыеҥ, шке капше дене тудым петырен, тыге куд йолташыжым сусыргымо да колымо деч арален коден.
Натальян шарнымашыжым лудат да тушто тынар шуко шинчавӱд йогымым, лишыл еҥым чот йӧратымыжым шижат. Тыгак тиде каласкалымаш мемнам сӧй кайыме пасушко намиен шогалта…
Станислав – Шойбулак селаште шочшо марий пӧръеҥ. Чоҥышылан тунем лектын, строительный фирмылаште мастерлан пашам ыштен, а вара шке пашажым почын. СВО-што штурмовой отрядын пулемётный расчётшын командиржылан шогалтеныт.
Ме шкенан Геройнам шарнаш тӱҥалына. Савыкталтше «Живите, пацаны» шарнымашым лудшына-влаклан марлашке кусаренна.
Книгаште Марий Эл гыч эше СВО-н участникше Дмитрий Дубниковынат (позывнойжо – «Ушан») кок шарнымашыже ойлымаш семын савыкталтын.
Илыза, пацан-влак!
2023 ий 12 июль. «Следак» позывноян Сергей Шадринын пелашыже йыҥгыртыш. Сергей Станислав дене пырля служитла. Телефон пучын вес могырыштыжо ӱдырын чытырналтше йӱкшым колам.
Трук тушто судын пунчалже семын шоктыш: «Наташа, Стас тетла уке! Тау Стаслан, тудо мыйын пелашемым утарен коден!» Эн ончычак ушышко шонымаш пурыш: «Чыла тиде шоя!» Но уке улмаш…
х х х
Тиде 2023 ий 6 июльышто лийын. 21-ше бригадын штурмовой отрядше Жеребец эҥерын пурла серыштыже неле бойышто кредалын. Артиллерийын тулжым бронетехникын контратакыже вашталтен, тушман мом йомдарымым мӧҥгеш поген налаш тӧчен, талын чоҥештен толшо квадрокоптер дене салтак-шамыч ӱмбаке гранате-влакым кышкылтын.
Йӱдым чыла шыпланен. Штурмовик-влак колышо ден сусыргышо-шамычым нумал луктеденыт. Тул дене ваштарешла шогышо группо, кушто лийын мыйын пелашем, салтакым эвакуироватлен. Трук рвезе-шамыч эскерышын йӱкшым колыныт: «Кайык! Кудалтыза!» Чоҥештен толшо гранате деч шылаш манын, салтак-влак иканаште тӱрлӧ могырыш куржыныт. Лачак сусыргышо сарзыеҥ йолгорнышто киен кодын. Стасик «Живите, пацаны!» манын кычкыралын да гранате ӱмбаке тӧрштен. Куд еҥ. Куд еҥын илышыжым утарен коден. Сӧй пасу гыч тудым «Следак» нумал луктын.
х х х
Мый палем, тудо вес семын ыштен кертын огыл. Вет тудо чын пӧръеҥ да аралыше. Стасым нимогай нелылык ден сусыргымаш чактарен огытыл. Йӧратымем 2023 ий 20 февральыште икымше гана сусырген, кунам группыжо засадышке логалын. Тунам мыйын героем йолташыже-влакым арален коден моштен. Тидлан варажым тудлан «За отвагу» медальым кучыктеныт.
Шарналтеш колымыж деч ончычсо мутланымаш. «Наташенька, чылажат сай. Вашке отпускыш толам!» Кузе тыге лектын, мый ынде тудын кугун да порын шыргыжмыжым ом уж?! Эн шерге еҥна тетла укем шӱм-чон кӧргӧ дене умылен налын, ушышкем шонымаш пурыш: «Йоча-влаклан… Йоча-влаклан… Кузе тидым икшывына-шамычлан каласем?»
х х х
Вучыдымо йыҥгыр чын илышыш пӧртылташ полша. «Авай, мый мӧҥгӧ толнем. Мыланем моткоч йӧсӧ. Наҥгай мыйым тышеч», – йодеш ӱдырем. Варажым авам йыҥгырта. Лач туддене ӱдырем шоген. Авам тургыжланенрак ойла: «Наташа, Златам налаш тол. Тудо шкаланже верымат ок му». Тунам мом мый вашештен кертынам, лачак пелештышым: «Стас колен».
Варажым ме пелашем, ачашт дене чеверласышна… Йоча-влакым лӱдыкташ огыл манын, ванныйыш пурен шортынам.
Икана соцкылыште поэтессе Светлана Корепанова мыланем воза: «Наталья Александровна, мылам омешем Тендан пелашдан подвигше койын. Эрдене почеламутым возенам». Тиде содор возалтше корныла лийын огытыл, кажне шомак – Станиславын илыш корныжо:
«Был с рожденья предан он Отчизне.
По веленью сердца своего
Ради мирной и спокойной жизни
Станислав ушёл на СВО…»
х х х
Да, йӧратымем ыш пӧртыл. Стасик шке ешыжым гына огыл, а чыла еҥымат аралаш шонен. Ынде тудо мемнам кававомыш гыч арала. Мый тыге шонем: «Илыза, пацан-влак!» ойсавыртышыже боевой йолташыже-влаклан гына огыл ойлалтын, тыгак мыланна, чылалан. Мыланна кызыт туге илыман, тек колышо Геройна-влак, а нуно Тул дене волгалтарыше салтакна-шамыч улыт, мемнан дене кугешнен кертышт.
Эльвира Терентьева.