Кодшо кечылаште Российыште палыме музыкант, шансонье Владимир Курскийын «Марий Эл» мурыжо пеш писын ятыр еҥ деке миен шуо. Тудо ты мурым «Города России» альбомышкыжо пуртен. Тушто чылаже элнан 76 кундемже нерген муро уло.
Музыканче мутшымат, семжымат шкеак воза. «Марий Эл» мурым ош тӱняшке лукташ Москосо студийыште кок тылзе наре тыршенна», – манеш автор. Мурышто тудо кундемнам «чудо» манеш. Тиде мурым колмеке да видеоклипшым ужмеке, Марий Элым палыдыме айдемыжат ты кундемым йӧратен шынден кертеш. Тидлан Владимирлан таум гына ойлаш кодеш.
УМБАКЫЖЕ — 1 апрельысе номерыште лудса.