Элыштына «Тоштер – чылалан» инклюзивный акций эртаралтеш. Тудын дене келшышын, тоштерлаште тӱрлӧ программым ямдылат.
5 декабрьыште Йошкар-Оласе Т.Евсеев лӱмеш Национальный тоштерыште «Марий ӱдырамашын тӱняже» программе лиеш. Тушто XX курым тӱҥалтышысе марий калыкын тӱвыраж дене палдарат. Тыгак ешыште, озанлыкыште да кидпашам вораҥдарымаште ӱдырамашын рольжо нерген каласакалат. Программе йоча да кугыеҥ-шамычланат пайдале лийшаш. Вет тушто кеч-могай ийготан еҥ шинчымашыжым пойдарен, ум пален налын кертеш.
Палемдыман, ты программе «Трогательный мир марийской культуры» ончер почеш илышыш шыҥдаралтеш. А тидыже кундемыштына начарын ужшо да йӧршеш сокыр йоча-влаклан лӱмын келыштаралтше икымше инклюзивный площадкылан шотлалтеш. Тудо Марий Элысе тӱвыра поянлыкым арален кодымо да шымлаш кумылаҥдыме амал дене шочын.
Начарын ужшо але йӧршеш сокыр да нуным вӱден коштшо еҥ-шамычым яра пуртат. Программыш ушнаш шонышо-влаклан 8(8362)34-75-32 телефон номер дене ончылгоч йыҥгыртен возалтман.
Т.Евсеев лӱмеш Национальный тоштерын сайтше гыч налме фото.