14 мартыште Политехын икымше корпусшын актовый залыштыже «Мисс и Мистер Волгатех – 2025» конкурсын финалже эртаралтын.
Мероприятий ятыр оҥай татлан поян лийын. Вет тылеч ончыч конкурсант-шамычлан шкеныштым тӱрлӧ шӧрыныштӧ ончыкташ кӱлын. Таҥасыше-влак коклашке логалаш манын, кастингым эртеныт. Туштыжо конкурсант-шамычын сценыште шкем кучен, калыкын кумылжым савырен моштымыштым палемденыт. Тылеч вара участник-шамыч тӱрлӧ йыжыҥыште мастарлыкышт дене палдареныт. Тыгак нунылан лӱмын келыштаралтше фотосессийыште, экскурсийыште, мероприятийыште участвоватленыт. Конкурсант-шамыч шкенышт нерген ВКонтакте соцкылысе «Мисс и Мистер Волгатех 2025» тӱшкаште палдареныт. Туштыжо нунын нерген ятыр фотом, видеом, факт-влакым эскераш лийын.
Конкурсын финалже кугу пайрем гай эртен. Тудо шоу сынан лийын. Тушто сеҥыше-шамычым палемденыт. Тыге Волгатехын Миссше лӱмым экономический факультетын студенткыже, марий ӱдыр Карина Ефремова сулен. А Волгатехын Мистерже управлений да праве факультетын студентше Данил Ульянов лийын.
Фото: Волгатехын сайтше гыч налме.