Шке жапыштыже Дмитрий Калягинын лӱмжӧ Марий Элыште чӱчкыдын йоҥген. Алина Макарова (кызыт Семенова) дене пырля вич ий ончыч ямдылыме «Ялем, ялем» мурыжо да клипше кумдан шарленыт ыле. Мутшым Дима шке возен. Рвезылан тыгай мастарлык коча-коваже Роза ден Павел Калягинмыт деч куснен, очыни.
Дима вич ий наре шочмо кундемже деч ӧрдыжтӧ, Моско олаште, ила. Туге гынат шочмо Марий Элын, марий калыкшын илышышт, марий муро верчат чонжо йӱла. Шукерте огыл «Мариечка» лӱман клип ош тӱням ужо.
– Чайым йӱын шинчышемла, шочмо мландемлан надырым пышташ шонымаш ушышкем вучыдымын тольо. Тыге «Мариечка» лӱман мурым возаш шонен пыштышым. Кок шагат жапыште текст шочо. Жапым шуйкалыде, семым возаш йолташем Дима Погадаев деке йыҥгыртышым. Рвезе руш эстрадыште Митя Наити семын кумдан палыме. Тудак аранжировкым келыштарыш, сылнын муралтыш. Текстын ужашыжым марий йылмыш Христина Александрова кусарыш. Вара мый клипым войзенам, – ойла Д.Калягин.
«Мариечка» мурым кок йылме дене возымо. Д.Погадаев – руш рвезе, садлан марла мураш тудлан йӧсырак лийын. Но йӱкым возымо студийыште ятыр жап пашам ыштымеке, удан огыл лектын.
– 2011 ий годсек муро тӱняште илем. Тӱҥалтыште рэп келшен. Жап эртымеке, тӱрлӧ экспериментым ышташ кумылем лектын. Тунам Дима Калягин дене палыме лийынна. Тудо мыйым ятыр проектышке ӱжын. «Мариечка» мурым да клипым шочыктымашат мый дечем посна эртен огыл. Мемнан тӱҥ шонымашна: марий ўдыр нерген мурым марий калык коклаште гына огыл – тӱня мучко шараш. Тыгай сынан муро да клип марий эстрадыште уке манын шонена. Эшежым икымше гана марла мураш пиал шыргыжале, – каласкала Д.Погадаев.
Клипын сюжетше оҥай. Действий кум олаште кая: Йошкар-Ола, Моско, Озаҥ. Моско олаште илыше рвезе Йошкар-Ола гыч марий ӱдыр дене Интернет полшымо дене палыме лиеш, коктын телефон дене кутырат. Вара вашлийыт. Тиде жапыште вес мужыр ончыкталтеш. Но кок рвезын ӱдыржӧ иктак. Моско гыч толшо рвезе кафеш пура – йӧратыме ӱдыржым вес рвезе дене ужеш. Моткоч ӧреш. Тидын жапыште тыгаяк чуриян ӱдыр омсам почын пура. Нуно йыгыр улыт улмаш. Рольым Провой кундем Эсмекпляк ял гыч Оля ден Юля Батолинамыт модыныт. Шижмашышт нерген ӱдыр-влак тыгерак каласышт:
– Клипыште сниматлалташ мыланна Дима Калягин темлен. Келшаш але уке, шуко шоненна. Содыки мастарлыкнам ончыкташ шонен пыштышна. Камере ончылно пашам ышташ огына йӧрате. Кок кече мемнам войзеныт. Тӱҥалтыште чоныштына тургыжланымаш ыле. Жап эртымеке, чылажат шулен. Икманаш, рольышко пуренна.
Клип куштымашлан поян. Войзалташ И.С.Палантай лӱмеш тӱвыра да сымыктыш колледжыште туныктышо-хореографлан тунемше кок ӱдырым: Аида Иванова ден Вера Ямбулатовам — ӱжынна. Нуно мастарын куштеныт да клиплан у тӱсым пуртеныт.
Мыланемат тиде проектыште пашам ышташ кугу пиал лийын. Мый припевым марлаҥденам, да руш текстышкат икмыняр марий мутым ешаренна. Муро ден клип марий ӱдырым чапландарат да чылалан келшат манын ӱшанена.
Клипым соцкыллаште, You Tube каналыштыже ончаш лиеш.
Х.АЛЕКСАНДРОВА.
Д.КАЛЯГИНЫН фотожо-влак.