Декабрьыште Марий Элым вуйлатыше А.Евстифеев республикнан чапшым тӱрлӧ таҥасымаште сайын аралыше спортсмен-влак дене вашлийын. Тыгай еҥ-влак коклаште марий ӱдыр Кристина Васильева лийын. Тудо панкратион дене заниматла.
Кристина Морко район Шӱргыялыште шочын-кушкын. Шӱргыял тӱҥ школ (тудо Кораксола ялыште верланен – Авт.) деч вара строительный техникумыш «земельно-имущественные отношения» специальностьлан тунемаш пурен. Тений дипломым налын.
— Кристина, кунамсек панкратион дене заниматлет?
— 9-ше классыште тунемме годым иктаж-могай кучедалмаш дене заниматлаш шонен пыштенам, но тидлан йӧн лийын огыл. Мый ече дене коштынам, куржталыштынам. Вара техникумыш пурымеке, комплексный единоборствылан тунемаш кумылан-влакым погымо нерген увертарымашым ужынам. Тыге икымше курс годсек спортын ты видше дене заниматлем. Тренировко-влак Йошкар-Оласе Россий Армий полатыште эртаралтыт. Тренерем – марий пӧръеҥ Александр Васильевич Шабердин.
— Тугеже чемпионатлашке тый шукертак коштат?
— Кум ий единоборство дене заниматлем. Панкратион дене таҥасымашке пел ий ончыч кошташ тӱҥалынам. Мартыште Озаҥыште эртаралтше Россий первенствыште кокымшо верым налынам. Тиде мыйын икымше кугу таҥасымашем да икымше сеҥымашем лийын. А ноябрьыште Марий Элын чапшым тӱнямбал чемпионатыште араленам. Тудо Белоруссийысе Бобруйск олаште лийын. Тушеч ший медальым конденам. Декабрьыште Йошкар-Олаште эртаралтше регион-влак кокласе турнирыште икымше верым налынам. 18-19 ияш, 60-64 килограмм нелытан категорийыште выступатлем.
— Юмо аралыже осал деч, но палаш оҥай, илышыште кредалашет логалын?
— Уке. Но йолташем-влак, иктаж-мо тыгай лиеш гын, мыйым ӱжыт манын, мыскарам ыштен ойлат.
— Мо дене панкратион моло единоборство деч ойыртемалтеш?
— Панкратион дене таҥасымаште эрыкан, греко-римский кучедалмаш, самбо, дзюдо, бокс да моло единоборствысо техникым кучылташ лиеш. Адакшым панкратионышто чот сусыргаш огеш лий.
— Тыйым ончен иктаж йолташет единоборство дене заниматлаш кумылаҥын?
— Икмыняр йолташем тренировкем кузе эртыме, спортын ты видше дене заниматлаш тӱҥалаш мом ышташ кӱлмӧ нерген йодыштыныт. Коеш, нуно тидлан тунемнешт.
— Арняште тренировкылан жапым шуко ойырет?
— Чемпионат вашеш тренировко кажне кечын эрдене да кастене эртаралтеш. Кокыт-кок шагат утла шуйна. А тыгеже арняште кум-ныл гана тренировкыш коштам.
— Панкратион дене заниматлаш мо кӱлеш?
— Вий да кумыл эре лийшаш. Тылеч посна экипировко кӱлеш. Кажне спортсменын шлем, боксер перчатке, бандаж лийшаш.
— Лишыл еҥет-влак, единоборство дене занятийыш коштметым пален налмеке, мом тылат ойленыт?
— Ешем – тӱҥ эҥертышем. Мылам эре полшен шогат. Ача ден авам тидын шотышто тореш лийын огытыл. А теве ковам Любовь Даниловна (ачамын аваже) мыйым пеш чаманен. Шкемым сусыртем манын лӱдын. Ӱдырлан кредалман огыл манын ойлен.
— Спорт деч посна чонет молан шӱман?
— Книгам лудаш йӧратем. Гитар дене шкевуя шокташ тунемам.
— Ончыкылыклан планет могай?
— МВД учрежденийлаш пашаш пурынем. Кӱшыл образованийым налнем. Ӱшанем, У ий мылам шуко сайым конда.
К.Васильеван альбомжо гыч налме фото.