Красноярск олаште «Азия Сибирь-2024» XVIII Тӱнямбал талант да моторлык конкурсын финалже лийын. Тушко 18 ий жапыште икымше гана марий ӱдыр логалын.
Ю.Аксюбина – Татарстан Республикысе марий-влакын национально-культурный автономийыштын самырык-влак тӱшкан ончылъеҥже да Татарстанысе калык-влакын молодёжный ассамблейыштын советшын еҥже.
Юлия – пеш чолга да марий калыкшым йӧратыше ӱдыр. Тудо Морко район Шлань ялыште шочын-кушкын, ача-аваже кызыт Волжск олаште илат. Озаҥ оласе музык консерваторийым тунем пытарен. Всероссийский да Тӱнямбал конференцийлаште марий музыкальный культур нерген докладым лудеден. Ӱмаште Озаҥ олаште эртаралтше Российысе Специальный олимпиадыште волонтёр семын пашам ыштен.
Юлия яра жапшымат пайдалын кучылтеш, бокс дене тренировкыш коштеш, кӱсле дене шокташ туныкта.
Юлия дене кугешнена. Ончыкшымат тӱрлӧ кӱкшытан мероприятийлаште марий калыкшым чапландараш тӱҥалеш манын ӱшанена.
«Азия Сибирь» тыглай конкурс гына огыл. Тушто участнице-влак шке калыкын тӱвыраж дене палдарат. Тений финалыш лекше 12 ӱдыр сӱан йӱла дене палымым ыштеныт, еш йӱла нерген видеороликым шкеак режиссироватленыт да шкеак тушто сниматлалтыныт, национальный вургем да кас тувыр дене дефилем ончыктеныт.
Любовь Михайлова.
Татарстан.
