1-7 мартыште Сочи олаште Самырык-влакын тӱнямбал фестивальышт эртен. Тушко шӱдӧ утла эл гыч коло тӱжем наре ӱдыр-рвезе ушнен. Марий Эл гычат делегаций лийын. Нунын коклаште – марий ӱдыр К.Макарова.
Туныктышо лияш шонен
Ксения Морко район Шап Унчо ялыште шочын-кушкын. Унчо кыдалаш школым шӧртньӧ медаль дене пытарен. Ятыр предметла дене уш-акылжым олимпиадылаште терген, спорт таҥасымаштат ойыртемалтын.
Ӱдыр изиж годсек туныктышо лияш шонен. Тыге МарГУ-со Калыкле тӱвыра да тӱвыра кокласе коммуникаций институтыш шочмо да англичан йылмылам туныктышылан тунемаш пурен. Вузыштат ӱдыр шкенжым тӱрлӧ могырым шуараш тырша: конкурслашке да мероприятийлашке кумылын ушна. Кызыт шуко жапым шанче паша да статья-влаклан ойыра.
Туштым туштен
К.Макарова дене Самырык-влакын тӱнямбал фестивальыш кузе логалмыже да моло нергенат мутланышна. Ксения тыгерак каласкалыш:
– Мыланна тушко каяш кураторна темлен. Тушто Марий Элын стендше дене моло-влакым палдараш кӱлын. Тидлан ме кум марий ӱдыр кок арня ямдылалтынна. Кажныже могай-гынат сомыллан мутым кучен. Мутлан, мый марий тушто-влакым участник-шамычлан туштенам, йомак да тӱр нерген каласкаленам. Вес элласе участник-влаклан англичан йылме дене умылтараш тыршенам. Тыгак шочмо кундемнан тӱвыраже, илыш-кучемже, йӱлаже да моло нергенат кажне кечын каласкаленна. Марий семӱзгар дене палдаренна, уш-акылым да чулымлыкым тергыше модыш-шамыч дене модыктенна, марий мут-влакым туныктенна. Пӧлек шотеш кундемна дене кылдалтше изирак пӧлекым кучыктенна. Тидланже участник-шамыч моткоч йывыртеныт ыле. Йот элласе участник-шамыч чӱчкыдын марий йылме нерген йодыштыныт.
Почеламут марла йоҥген
«Марий Эл нерген пален налаш кумылан-влак ятыр ыльыч?» – йодым тудын деч. Вашмут тыгайрак лие:
– Республикнан стендше утыжым кугу лийын огыл гынат, участник-шамыч эреак толыныт. Тӱҥ шотышто республикнан кушто верланымыжым йодыныт. Озаҥ ола деч тораште огыл манмеке, шукыштлан раш лийын. Йот элласе ӱдыр-рвезе-влак пошкудо республик нерген шуко палат улмаш, ынде Марий Эл нергенат шинчымашыштым пойдареныт. Республикнан стендыштыже кок кугу экран гоч Марий Эл нерген сюжет-влак ончыкталтыныт. Кундемнан мотор верлаже да ойыртемалтше пашаж нерген субтитр-влак полшымо дене каласкалыме. Почеламутым марла лудаш але сценкым модын ончыкташ йодшо-влак ятыр ыльыч. Тыгайже годым ӱдыр-влак дене импровизацийым ышташ логалын.
Опытым погеныт
– Йот элла гыч толшо ӱдыр-рвезе-влак нерген мом каласет?
– Чылан гаяк чолга, поро кумылан лийыныт, вашла эреак шыргыжыныт. Йот элла гыч толшо-влак дене англичан йылме дене мутланенна, тидыже мыланна шкешотан опыт. Вет ме англичан йылмым туныктышо лияш ямдылалтына. Шым кече жапыште вашла тунемын шуынна. Южышт мемнан стенд деке кажне кечын толыныт. Сандене нунын дене лишкырак палыме лийынна. Пытартыш кечын кужу полотнош тӱрлӧ эл да кундем гыч толшо участник шке йылмыж дене Марий Эллан шке тыланымашыжым возен але саламым колтен. Тидыже мемнан шкешотан ойыртемна лийын.
– Фестиваль мо дене шарнымашеш кодын?
– Фестиваль тӱрлӧ калыкын илыш радамже нерген пален налаш сай йӧным ыштен. Тидланже моткоч куаненна. Тыгак шукыштын руш йылмым палымыштым палемдынем. Мутлан, Китай гыч толшо участник-шамыч моткоч сайын рушла мутланат. Марий Элын стендше дене лийше участник-шамыч могай-гынат пӧлек дене эреак куандареныт. Татарстан Республик гыч Zakaria группо мыланна марла мурым йоҥгалтарен, тидын дене кумылнам нӧлтен. Эше ятыр тыгай ойыртемалтше тат-влак нерген каласкалаш лиеш. Тӱҥжӧ – кажныже чоннам эше ятыр жап ырыкташ тӱҥалеш. Сандене самырык-влаклан тыгай кӱкшытан мероприятийлашке ушнаш лӱдман огыл.
Ксениян ойлымыж дене келшыде огеш лий. Чынжымак, чолга ӱдыр-рвезе-влаклан тӱрлӧ шонымашыштым илышыш шыҥдараш элыштына корно эреак почылтшо!
К.Макарован албомжо гыч налме фото.