7 январьыште Первый канал дене «Рождество с Григорием Лепсом» концертыште марий ӱдырымат ужаш лийын.
Тушто мурызо Александр Ивановын мурымыж годым Марий Турек район Марий Купто ялыште шочшо Вероника Ягодарова талантан ӱдыр-влак дене пырля скрипкым шоктыш. Тудо 2016 ийыште Национальный президент школым да 2020 ийыште И.С.Палантай лӱмеш тӱвыра да сымыктыш колледжым тунем пытарен. Варажым Э.Сапаев лӱмеш опер да балет театрын оркестрыштыже ик идалык пашам ыштен. Кызыт Моско областьыште ила да Дмитров ден Лобня олалашке йоча-влакым скрипке дене шокташ туныкташ кудалыштеш. Тылеч посна Вероника ятыр мероприятийыште еҥ-влакым сылнысемже дене куандара.