Надежда Шишкина Советский посёлкышто шочын, а кызыт Озаҥ олаште ила да дизайнерлан пашам ышта.
– Надя, айда йоча пагытетым шарналтена…
– Мый Советский посёлкышто шочынам, но вара ешна У Торъял районысо Тушнур ялыш илаш куснен. Авам – Светлана Иннокентьевна – медсестралан пашам ышта, ачам – Юрий Анатольевич – Элгӧрӧ паша органыште.
Шинчымашым У Торъял посёлкысо школышто погенам. Изи годсек сӱретлаш йӧратенам. Сандене пырдыжгазетым, классыште уголокым сӧрастараш эре мылам ӱшаненыт. Тылеч посна тӱрлӧ конкурслаште шке мастарлыкем тергенам. Спектакльлаште модынам, гитар дене шоктен муренам. Мурым йӧратымаш ачаавам деч куснен: ачам гармонь дене шокта, а авам мура.
– Дизайнер профессийым кузе ойырен налынат?
– Кандашымше классыште тунеммем годым интерьер шотышто дизайнер лияш шонен пыштенам. Мыланем сӱретлаш, сӧрастараш, моторлыкым ышташ келшен.
Школ деч вара Киров оласе Вятский гуманитарный университетыш «Дизайн среды» направлений дене тунемаш пуренам. «Живопись» але «Рисунок» дисциплинылам йӧратенам. «Студент шошо» фестивальыште участвоватленам, университетын студактивыштыже лийынам. Яра жапыште студотрядыш коштынам. Тушто мемнам вожатый лияш туныктеныт. Тидыже мыланем Краснодар крайыште верланыше «Орлёнок» йоча лагерьыш логалаш полшен.
Кажне ийын университет гыч чолга студент-влакым Крымыш теҥыз воктеке канаш але Киров ола деч тораште огыл верланыше горнолыжный комплексыш колтеныт. Мыят тиде радамыш эре логалынам. Ик гана телым гын, вес гана – кеҥежым.
2013 ийыште Озаҥыште эртаралт — ше кеҥежымсе Тӱнямбал Универсиадыште волонтёр лийынам. Тунам мый тиде олам йӧратен шынденам. Тунемын лекмеке, тышке илаш толаш шонен пыштенам. 2016 ий годсек Озаҥыште илем. Ондак «Интердизайн» мебельым ыштыше компанийыште пашам ыштенам, а кызыт «Леди архитектор» дизайнс тудийыште тыршем.
– Могай пашам шуктат тыгай ойыртемалтше ӱдыр-влак?
– Ме пачер, кофе, ресторан, салон-влаклан проектым ямдылена да ты пӧлемлаш моторлыкым пуртена.
– Тый тыгак Озаҥ марий-влакын ушемыштышт улат. Кузе тушко логалынат?
– Тиде тӱшкаш да «Лай мардеж» ансамбльыш мыйым палымем Алексей Ахтямов ӱжын. Тыште тӱрлӧ регионла гыч чолга ӱдыр-рвезевлак погыненыт. Вургем да диалект дене ойыртемалтына гынат, икте мемнам уша – ме марий шӱлышан улына.
Ынде кок ий тиде ансамбльыш коштам. Ме конкурслаште шке мастарлыкнам ончыктена. 2019 ийыште Семык пайремыш миенна. Тыгак Озаҥ олаште концертым чӱчкыдын ончыктена.
Коллективнан шке йӱлаже уло: марий пайремвлакым эртарена, изирак концертым шындена. Тыгак самырык мурызо, поэт-влакын творчествыштым эскерена, нунын дене вашлиймашым, мутланымашым да каҥашымашым эртарена. «Лай мардеж» ансамбльыш коштмемлан кӧра мый марий йылмем, калыкем, йӱлам чотрак пагалаш, аклаш да йӧраташ тӱҥалынам.
– Паша, ансамбль… А яра жап годым мом ыштет?
– Паша да ансамбль деч посна англичан йылмым тунемме курсыш коштам. Шонымашем уло: тӱням ончал савырнаш. А тидлан йот йылмым палыман, сандене шинчымашем пойдарем.
Тылеч посна бассейныш, фитнес залыш, бачата куштымашым тунемаш коштам. Ты тӱняште мыланем чылажат оҥай, шукым пален налаш шонем.
– Кызыт мӧҥгыштӧ шинчыме режимым кузе эртарет?
– Шукырак жапым ешем дене эртараш тыршем. Шукертсек шонымо, но ыштыдыме паша-влаклан жап лектын. Книгам лудам, картиным возем, кудывечым сӧрастарем. Тыгак пашамат дистанционно ыштем.
Ты тӱняште чылажат вашла кылдалтын, да тиде пагыт арам огыл мемнан деке толын шуын. Сандене тиде неле жапыште чыла умылен шуктыман да изирак иктешлымашым ыштыман.
– Надя, тек умбакыжат тыйын илышыштет чыла сай гына лиеш. Творческий шӱлыш эре чоныштет озаланыже. Шонымашкет шуаш тыланем!
– Тау!