Российна тӱрлӧ сеҥымаш дене чаплана. Тидын нерген Достижения.рф сайт каласкала. Лачак кызыт Марий Элысе балет элысе эн сай радамыш логал кертеш. Тудын верч шке йӱкнам Достижения.рф платфромышто пуышаш улына.
Марий Элысе балетын ончыкылыкшо волгыдо лиеш манын кугу ӱшан уло. Вет ты шотышто ятыр сомыл ышталтын. Кызытат Э.Сапаев лӱмеш опер да балет театрыште тыршыше-влак оҥай проект-шамычым ворандарат.
Марий Эл Республикыш Москосо Кугу театр гыч землякна, балет артист К.А.Ивановын пӧртылмыжӧ да Марий Элысе балетым вияҥдаш тӱҥалмыжлан кӧра Марий кундемыште тиде сфере утыр тӱзланен толеш.
Шукерте огыл тӱвыра, печать да калык-влакын пашашт шотышто министр Констанин Иванов 50 ияш лӱмгечыжым палемдыш. Тидын вашеш туддене вашлийын мутланыме годым марий балет нерген мутым лукна. Тыгодым ешарем: Российыште балетым куштышо тӱвыра министр тетла уке.
Шке тыршымыштлан кӧра гына
К.А.Иванов тунам тыгеракын ойлыш:
– Мо дене Марий кундемысе балет тӱня, мутлан, Москосо деч ойыртемалтеш? Мемнан дене, театрыш пашаш толын, балетым кушташ кумылан 300 дене еҥ черетыште огеш шого. Кӧ куштен кертеш, чылаштым налына. А педагог семын пашам ыштыме жапыште чот талантан тунемше шагал вашлиялтеш. Пӱртӱс нунылан лачак балетлан келшыше капым, моштымашым пуэн огыл гын, тунемше-влак шке тыршымыштлан да шкем тугыштмылан кӧра гына сеҥымашыш шуыт. Тидыже моткоч кугу пиал мыланем! Мутлан, шукерте огыл премьер лӱмым сулышо Артём Васильевым налына. Тудым ме «Русский Гамлет» балетыште ужна, «Раймонд» балетыште Абдерахман кугыжам, варажым Спартакым куштыш. Тиде еҥ тӱжвач ончымаште йӧршеш балетлык огыл. А тудо таче пашаче улмыжлан кӧра чынжымак кугу куштызыш савырнен. Весе – Артём Веденкин. Тудынат чыла данныйже уке, но шкенжым премьер марте куштен кертын. Теве тидыже мылам куан – тунемшем-влак сеҥымашыш шуыт, тӱҥ солист лийыт, элнан тӱҥ сценышкыже кушташ лектыт. Тидын дене кугешнем! Ятыр критик нунын мастарлыкышт кушкын толмым ужеш да куанен палемда.
Чынжымак, кок Артём нерген шуко каласкалаш лиеш. А.Веденкин ятыр тӱҥ партийым куштен. 2018 ийыште Олык Ипай лӱмеш кугыжаныш молодёжный премий дене палемдалтын. Ты ийынак ГИТИС-ын балетмейстер факультетшым тунем пытарен.
А.Васильевым куштызо семын гына огыл, драмысе актёр семынат ужынна. Тудо «Анюта» балетыште Анютан ачаже Пётр Леонидовичым мастарын модо, «Белый лебедь» спектакльыште – Сергейым.
Коктынат неле партий-влакым ончыктымышт дене ойыртемалтыт: тӱрлӧ семын савырнылын, тӧрштылын, трюкым ыштен моштат.
Балет класслаште
К.А.Иванов Бауман лицей пеленысе «Лира» сымыктыш школын хореографический пӧлкажын балет класслаштыже тунемше-шамыч нергенат каласыш. Чынжымак, тушто ӱдыр-рвезе-влак 5 гыч 9-ше класс марте балетым кушташ тунемыт, варажым кум ийым – И.С.Палантай лӱмеш тӱвыра да сымыктыш колледжыште. Но тыгодым ты лицейын класслаштыжак заниматлат.
– Лишыл жапыште тунем лекше талантан выпускнице-шамыч нерген тыгеак кумдан каласкалаш лиеш. Теве Валерия Волкова ден Елена Раськинам ӱдыр-шӱдыр-влак манын кертам. Елена тунем гына пытарыш, ме тудым артист балет-влакын «Молодой балет мира» тӱнямбал конкурсышкышт Сочи олашке наҥгайышна. Тудо тушто кумшо верым нале. Сый тушто лийынам да ужынам: пӱй пурынак тыршен, вет тушто Москосо Кугу театр, Санкт-Петербургысо Марьиинский театр да моло вер гычат виян куштызо-влак таҥасеныт.
Бауман лицейыште балет классым кум идалыклан ик гана погат. Тидыже тунемше-влакым республикыште кодаш, театрым, профессийым йӧратен шындаш манын ышталтын.
К.А.Иванов пытартыш жапыште балетыште да оперыште историйым каласкалыше пашалан кугу тӱткышым ойыраш тӱҥалмыж нергенат ойлыш. Тидлан музыкальный материалат ситышын.
Историй сынан паша
Театрын художественный вуйлатышыже К.А.Иванов ВКонтакте соцкылысе шке лаштыкыштыже театрыште шуктымо пашаж дене палдаренак шога. Теве кызыт эше ик кугу пашан шукталтмыж нерген рашеме. Ты кечылаште Э.Сапаев лӱмеш опер да балет театрын труппыжо Беларусьышто «Большие гастроли» проект дене коштеш. 11 сентябрьыште тусо Кугу театрыште «Война и мир» балетын премьерыштыже театрнан 17 артистше выступатлен. Балетым эше Донецкысе опер да балет театрлан А.Петров шынден, музык шотышто оформлений – В.Овчинниковын. Постановкын генеральный продюсерже – Айдар Шайдуллин. Тидыжат Марий кундемысе балет сымыктышын кугу сеҥымашыже!
Мутат уке, балет направленийлан вияҥашыже кугу да чапле полатат полшен. Тышкат кугу надырым пышташ кӱлын. Балет ончыкыжымат вияҥшаш – Марий кундемысе балетым элыштына гына огыл, йотэлыштат палат да йӧратат.