Шукерте огыл Татарстанысе Менделеевск олаште «Идалыкын ӱдырамашыже. Идалыкын пӧръеҥже: ӱдырамаш шинчаончалтыш» республикысе конкурсын зональный этапше эртаралтын. Тышке участник-влакым муниципальный этапыште ойыреныт. А 8 Март пайрем вашеш Озаҥ олаште конкурсын финалже гӱжла.
Кажне ийын палемдат
Татарстаныште ты конкурс кажне ийын лиеш. Тудым республикысе Раисын, Паша, Тӱвыра министерстве-влакын, Айдемын праваж шотышто уполномоченныйын да Татарстанысе профсоюз федерацийын полшымышт дене «Женщины Татарстана» мер организаций эртара. Участник-влаклан тӱрлӧ номинацийым темла: «Ӱдырамаш – ава», «Ӱдырамаш – тӱвыра да духовность», «Ӱдырамаш – учёный», «Ӱдырамаш – лидер», «Ӱдырамаш – бизнес-леди», «Кумшо ийготын героиньыже», «Пӱрымашем – мыйын профессий», «Ӱдырамаш – идалыкын примерже».
Тушто шочмо кундемым социально-экономически вияҥдымашке, молодёжьым воспитатлымашке, еш институтым пеҥгыдемдымашке, тыгак тӱвыра ден йӱлам арален кодымашке надырым пыштыше ӱдырамаш-влакым аклат.
Тылеч посна ӱдырамаш-влакын организацийышт пӧръеҥ-влаклан кок номинацийым палемден: «Пӧръеҥ – лидер» да «Пӧръеҥ – поро кумылан шӱм». Тыште Татарстаныште сай илыш верч надырым пыштыше пӧръеҥ-шамычым ойырат.
Тӱҥ титул верч
Ондакысе зональный этаплаште 25-30 еҥат шке мастарлыкшым ончыктен. А тений тышке республикысе Агрыз, Актаныш, Мамадыш, Менделеевск да Муслюм районла гыч 22 участникым ойырен налыныт. Туге гынат кажныже ойыртемалтын, жюрилан шке визиткыжым ямдылен да варажым тудым слайд ден творческий номерла дене пеҥгыдемден.
Финалышке марий ӱдырамаш Любовь Килееват лектын. Тудо «Ӱдырамаш – ава» номинацийыште сеҥен, вет шочшыжо-влакым марий йӱла почеш ончен кушта да еш конкурслаште, тӱрлӧ творческий мероприятийыште шке мастарлыкшым ончыкта.
Каласыман: Менделеевск район гыч кок участник финалыш логалын. «Идалыкын примерже» номинацийыште Марина Глебовам ойырен налыныт. Тудо СВО участникын пелашыже семын «Мывместе» инициативный группо дене мемнан салтак-влаклан 22 тӱрлӧ направлений дене полшен шога. Моткоч сай примерым ончыкта.
Чолгалыкше дене ончылно
Любовь Васильевна ден Анатолий Александрович Килеевмыт Менделеевск олаште илат да кум шочшым ончен куштат. Йоча-влакын ачашт кугу фуро дене грузым шупшыкта, сандене чӱчкыдынак рейсыште лиеда. Авашт экономике образованиян, ондак 10-шо Исправительный колонийын производственный отделыштыже пашам ыштен. Ынде шымше ий йоча-влак дене мӧҥгыштӧ шогылтеш. Тыгодымак волонтёр лияшат ок ӧр: Пастернак лудмашым эртарымашке ушна, книга ярмиҥгалаште да моло вереат фотограф семын тырша, СВО участник-влаклан гуманитарный полышым пога.
– Кызыт эн тӱҥ пашам – йоча-влаклан полшымаш. Ме нунын дене шкенан оласе ден республикысе мероприятийлашке ушнаш тыршена. Школ ден йочасадын илышыштышт чолган участвоватлем, верысе тӱвыра полатлан полшем.
Икмыняр ий почела «Культурный дневник школьника» республикысе проектыш ушненам. 2019 ийыште Менделеевск районышто «Самый культурный родитель» номинацийыште сеҥенам да варажым республикыште участвоватленам, – каласкалыш шуко шочшан ава.
Ӱмаште Килеевмытлан «Ешын идалыкше. Кинотеатрын версийже» проектыште Гран-прим кучыктеныт. Чылаже тыгай награде республикыште кином ончаш ешге коштшо ныл ешлан логалын.
Кодшо ийынак ноябрь мучаште Аван кечыже лӱмеш Любовь Килеева шым ава дене пырля Менделеевск олаште «С любовью мама» фестивальыш ушнен. Участнице-влак ава лиймышт нерген историйым каласкаленыт, национальный вургем дене дефилем, шкешотан усталык номерыштым ончыктеныт. Тунам сценыште моторын выступатлымыж деч вара «Идалыкын ӱдырамашыже» конкурсыш ушнаш темленыт.
Семык пайрем ушен
Любовь Васильевна Грак селаште шочын-кушкын. Ачаже водительлан пашам ыштен, аваже бухгалтер лийын. Коктынат Марий Вожай ял гыч улыт.
А ончыкылык пелашыжым Люба 1998 ийыште Семык пайремыште вашлийын. Кугу Йырсе ял гыч кум ийлан кугурак качымарият тушко миен. Ынде 16 ий пырля ваш полшен да келшен илат.
Виталий 8-ше классыште тунемеш, а Ванесса 6-шо классыш коштеш. Нуно коктынат «Шаян» Российысе калык творчествын сулло коллективыштыже кушташ тунемыт. Ныл ияш Владиславамат вес гана тушкак ушаш шонат.
Ванесса ӱдырышт – Менделеевск районысо «Эрвел» марий муро калык ансамбльын участницыже. Тыгак тудо почеламутым лудмо таҥасымашлашке эре ушна. Теве ты тунемме ийын татар поэт Г.Тукайын шочмыжлан 140 ий темме лӱмеш эртарыме XV конкурсышто республикысе 14 район гыч участник-шамыч таҥасеныт. 5-8-ше класслаште тунемше-влак коклаште Совет Ушем Герой М.С.Фомин лӱмеш 1-ше номеран школышто 6 «Г» классыште тунемше Ванесса Килеева сеҥен.
Ӱмаште Татарстаныште эртаралтше «Марийская радуга» этнокультурный фестивальыште чолга марий ӱдыр «Художественное слово» номинацийыште кокымшо верым налын.
2025 ийыштак В.Килеева «Созвездие – Йолдызлык» эстраде сымыктыш фестивальыште «За искренность в творчестве» диплом-спецприз дене палемдалтын.
Кызыт ава Витя эргыжын классше дене пырля «Самый дружный класс» конкурсыш ушнаш ямдылалтеш. А Ванесса дене февральыште шындалтшаш спектакльысе роль-влакым тунемыт, мартыште вес спектакльже палемдалтын. «Созвездие» конкурс вуча. Тыгак йоча-шамыч строевой смотр конкурслан шуко жапым ойырат, ӱдыр школышто, а эргышт районышто участвоватла.
Марий ава икшывыжлан шкеак марий почеламутлам кычалеш, вет школышто шочмо йылмыштым огыт тунем. Мастар кидан ӱдырамаш нунылан марий вургемым шкеак тӱрлен-урген пуэн, сӧрастарышымат шкеак ышташ тырша.
– Ик конкурсымат посна ойырен каласаш ок лий. Чыланат опытым погаш да у еҥ дене палыме лияш полшат. Тидын денак кажныже шерге, – ойла Любовь Килеева.
Фотом еш альбом гыч налме.