МарГУ — 20 эн сай коклаште

26-27 сентябрьыште Москошто «Суперкомпьютерные дни в России» тӱнямбал научный конференций эртаралтын. Тудо науко, промышленность, бизнес, туныктымо паша, кугыжаныш орган да компьютерный технологий дене кылдалтше моло аланыште тыршыше-влаклан пӧлеклалтын.

Российысе тӱрлӧ организаций да компаний кокла гыч МарГУ-н MarGrid суперкомпьютерже 20-шо верыш лектын, а кугыжаныш вуз-влак коклаште кудымшо верым налын.

Палемдыман, МарГУ «Приоритет-2030» стратегический академический лидерстве программын участникше семын моло вуз коклаште визымше верым айла.

MarGrid – распределительный вычислительный технологий-влак сеть. Таче тудо вузын гына огыл, уло Марий Элын научно-производственный экосистемыжын негызшылан шотлалтеш. Тиде сеть учёный-влаклан компьютерный моделирований, радиолокаций, микроэлектронике, биоинформатике, искусственный интеллект да цифровой медицине направлений-влакым утларак вияҥдаш полша.

МарГУ-што тыгак Инжиниринговый рӱдер пашам ышта. Ты рӱдер А.Л.Минц лӱмеш радиотехнический институт дене пырля кугыжаныш оборонный заказ-влакым ямдыла. Марий Кугыжаныш университетын сеҥымашыже-влакым «Армия» тӱнямбал военно-технический форумышто ик гана веле огыл палемденыт.

МарГУ-што молекулярный биоэнергетике да медицине генетике шанче школ уло. Тушто онкологий чер-влакым пален налме да эмлыме, сакыр диабетым да Дюшеннын миодистрофийже чер-влак терапий шотышто шымлымаш паша-влакым эртарат.

Тений, МарГУ-што, «Приоритет-2030» программылан келшышын, научно-исследовательский лабораторий почылтын. Тушто неле черым эмлаш полшышо эмым ямдылымаште кугу пашам шуктат.