Майыште шокшо лийшаш

Тений апрель тылзе, кокла шот дене ончымаште, пытартыш 32 ий жапысе дене таҥастарымаште 0,8 градуслан левырак лие. 14 да 15 апрельыште юж 21 градус марте ырен. Тыгайже 1995 да 2012 ийлаште веле лийын. Йӱрат шагал огыл йӱрын. А могайрак лиеш май? Мо ден тудо моло ийлаште ойыртемалтын. Тидын дене Йошкар-Олаште илыше да ятыр ий игечым эскерыше Геннадий Иванович Рыбаков палдара:

Пытартыш 100 ийыште апрель 2 градуслан левештен гын, май 1,4 градуслан.

Пытартыш 40 ийыште май тӱҥалтыште эн йӱштыжӧ (-3 градус марте) 1999 ийыште лийын, а 6 майыште верын-верын -5 градус мартеат йӱкшемден. Май кыдалне 2002 ийыште термометрын столбикше 4 градус марте волен. Тиде ийын май мучаштат 3 градус йӱштӧ лийын. Эсогыл 31 майыштат южо веле кылмыктен ыле. А 2009 ий деч вара майыште Йошкар-Олаште ик ганат кылмыктен огыл. 2000 ий деч вара майын икымше пелыштыже юалге игече шогенат огыл, а кокымшо пелыштыже эре шокшо куандарен.

Пытартыш 35 ий ийыште 2002 да 2003 ийлаште йӱр пеш шагал йӱрын, молгунамже ситышын лийын. Пытартыш 20 ийым шымлыме ончыкта: 12 тылзе кокла гыч май эн кечан тылзе. Тений апрелят ояр кечылан поян (18 кече) ыле, молгунамже 13 кече дене веле лийын.

Пытартыш 40 ийыште майыште юж эн чот 2005 ийыште (+31 градус) да 2015 ийыште (+32 градус) ырен.

Калык ой почеш, ломбо пеледме годым (4 гыч 18 май марте) игече йӱкшемда. Но тиде ой пытартыш 20 ийыште пелыж годым чыныш лектын. Куд ийыште термометрын столбикше 0 градус марте да ӱлыкыракат волен.

1986, 1990-1992, 1999, 2000, 2002, 2008 да 2017 ийлаште майыште лумат лумын. Теве 2000 ий 15-27 апрельыште 18-20 градус шокшо шоген, а 30 апрельыште -1 градус марте йӱкшемден, лум лумын, мландым 2 см кӱжгытын леведын, южо вере 15 см мартеат шуын. Лум верын-верын 5 май марте киен. Лум 13, 14 майыштат лумын, мландым 6 см кӱжгытын леведын. 17 майыштат эрдене (но 20 минут наре гына) лум чот оптен.

Тений май пытартыш 30 ий жапысе май деч кокла шот дене ончымаште 2,5 градуслан шокшырак лийшаш, поснак кокымшо пелыштыже шокшым вучыман. А йӱр ситаш огеш тӱҥал дыр. 9 майыште 16 градус марте шокшо лийшаш.