Майлан гороскоп
Шорык. Ты тылзе романтик шӱлышан лиеш. Пайрем-влакым эртараш, путешествийыш тарванаш келшыше жап. У проект-влакым илышыш шыҥдарен кертыда, тидыже у кӱкшытым да сай оксам сӧра. У вашлиймаш-влак вучат.
Презе. Усталык шотышто мастарлыкдам ончыкташ келшыше жап. Сай пашадарым налыда, но окса дене тӱткырак лийза. Суртышто нелылык дене тӱкнен кертыда, поснак – олмыктымо паша шотышто. Лишыл еҥда-влакын тазалыкыштым эскерен шогыза. Корныш тарванен кертыда. Кенета вуйыш толшо шонымашым илышыш шыҥдараш ида вашке – нимогай сайыш ода шу.
Йыгыр. Йолташ, коллеге-влак дене ямдылыме проект-влак май кыдалне сай лектышым пуат. Договор дене кылдалтше йодыш шотышто поснак тӱткӧ лийман. У вашлиймаш-влак, йӧратымаш вучат. Тылзе мучаште кӧргыштӧ кужу жап нумалын коштмо «нелыт» деч утледа.
Рак. Кугу вашталтыш лиеш, у йӧн лектеш, у вашлиймаш-влак вучат. Паша вер шотышто шонымашда вашталт кертеш: мӧҥгӧ гычат пашам ыштен, кугу оксам ыштен налаш лиеш манмым умыледа.
Лев. Ты тылзын у вашлиймаш, усталык пашаште да спортышто кугу сеҥымаш-влак вучат. Окса шотышто тӱткырак лийза: иктаж планым илышыш пурташ кугу шийвундо кӱлеш лийын кертеш. Йолташда-влак шотышто шекланыза – южышт дене кыл лушка, ӱшанымым чарнеда.
Ӱдыр. Ешыште да пашаште вашталтыш-влак лийыт. Оксам айда-лийже кучылтман огыл. Кужу жап вучен коштмо корныш тарванеда. Лишыл еҥда-влак дене кутырымо годым шекланыза: утым ойлен колтымыдалан верч нунын дене кыл лушкен кертеш. Кугу пашадаран у паша верым темлен кертыт, но тидлан тыршашат шуко логалеш.
Виса. Корныш тарванаш темлат гын, тореш ида лий. Ты тылзын у кӱкшытыш шуаш йӧн лектеш. Пашаште сай лектышыш шуыда, а коллеге-влакын кычалтылмыштлан кӧра нунын дене кыл лушкен кертеш. Тылзе мучаште у сомыллан вучыдымын пижыда, тидлан роскотат кугу лиеш.
Скорпион. Пашаште кугу кӱкшытыш шуыда, но тидлан шуко вийым пыштыман да чылажымат писын ыштен шуктыман. Шкендан, лишыл еҥдан тазалык шотышто шекланыза. Вес еҥ дене кылым вашке муын моштымыда сай лектышым сӧра, а коллеге-шамыч коклаште умылыдымаш лийын кертеш. Пашам кӱлынак ыштыза, сурт сомыл нергенат ида мондо.
Пикшызе. Тыршен пашам ыштыме, мӧҥгылан да ешлан тӱткышым ойырымо жап. Ты тылзе усталык шӱлыш дене темеш, лишыл еҥ-влак йӧратымашыштым тыланда пӧлеклат. Путешествийыш каяш ӱжыт гын, келшыза – жапым пайдалын эртареда. Тылзе мучаште кугу пиал вуча.
Ирказа. Суртлан ятыр жапым ойыреда: илыме вердам шотыш кондеда, дизайн шотышто вашталтышым пуртеда. Тылзе кыдалне усталык пашаште кӱкшытыш шуыда. Лишыл еҥда-влак дене ӱчашаш, вурседылаш ида тырше. Ача-авада дек миен толза, тазалыкышт нерген пален налаш ида мондо.
Вӱд йоктарыше. Тунеммаште, пашаште у йӧн лектеш. Шонен коштмыда шукталтеш, но воктене улшо еҥ-влаклан жапым ойыраш ида мондо. Йӧратыме еҥ дене умылыдымаш лектын кертеш, садлан шукырак жапым пырля эртарыза. Тылзе мучаште пашаште, йӧратымаште да усталык пашаште куан вучат.
Кол. Окса шотышто йодышым рашемдаш, пашаште иктешлымашым ышташ логалеш. Тӱҥалме проект-влакым мучаш марте шуктен, у пашалан пижыда. Тазалык шотышто тӱткӧ лийза. Родо-тукымда дене кылым пеҥгыдемдыза. Шӱм пелашым муаш, кусараш лийдыме пого шотышто йодышым рашемдаш келшыше жап.