«Майатул» фестиваль

«Майатул» фестивальын символжо – финн-угор пушеҥге, покшелныже – илышым пуышо муно. Тений тудым икымше гана скульптур семын ямдыленыт да сеҥышылан кучыктеныт. Скульптурым Сергей Яндубаев ыштен.

СЕҤЫШЕ-ВЛАКЫМ ТӰРЛӦ НОМИНАЦИЙЫШТЕ АКЛЕНЫТ.

Гран-Прим Мордва кугыжаныш национальный драмтеатр «Куйгорож» йомак-быль дене сеҥен налын. Ты спектакльыштак Уняжан образшым моштен чоҥымыжлан самырык актрисе Евгения Акимова «Самырык актёрын эн сай пашаже» семын палемдалтын. А «Эн сай пӧръеҥ роль» номинацийыште Пятам модшо Дмитрий Мишечкин сеҥен. «Эн сай ӱдырамаш роль» – Коми-Пермяк национальный драмтеатр гыч Галина Никитина Пульхерия Ивановнан рольжылан («Кококкез, кококкез, кококкез» спектакльыште). Ты спектакль «Эн сай сценографический решений» номинацийыштат ойыртемалтын. А спектакльын режиссёржо Татьяна Воронина классике сюжетым тачысе театрыште моштен ончыктымыжлан палемдалтын. «Эн сай режиссура» номинацийыште «Окса тул» спектакльым шындымылан Василий Пектеев палемдалтын.
В.Тумбаевын фотожо.

Н.Моисееван видеожо.