1 сентябрь гыч студентке-влаклан мӱшкыраҥме да азам ыштыме шотышто пособийым ынде Россий Социальный фондын Марий Эл Республикысе пӧлкаже тӱла. Ондак тунемме тӧнеж пуэн.
У тунемме идалык гыч пособийым кундемыштына пашам ыштен кертше еҥлан илен лекташ ситыше эн изи кугытым (2025 ийыште – 17 009 теҥге) ончен шотлат. Тыге Марий Элыште мӱшкыраҥме да азам ыштыме шотышто 140 кече отпусклан пособий 79 375 теҥге лийын, азам нелын ыштыме годым – 88 446 теҥге, кок да утларак йочам ыштыме годым – 109 991 теҥге. Ондак пособийым стипендийын кугытшым ончен тӱленыт.
Выплатылан вузышто, училищыште, колледжыште, техникумышто, тыгак ешартыш профессиональный образованийым пуышо да научный организацийлаште очно оксам тӱлен але яра тунемше студентке-влакын правашт уло.
Пособийым налаш йодмашым мӱшкыраҥме да азам ыштыме шотышто отпуск пытымеке, пел ий жапыште пуаш лиеш. Тидым госуслуго портал, тыгак Россий Социальный фондын Марий Элысе пӧлкажын кеч-могай клиентский службыжо але шуко функциян рӱдер гоч ыштыман.
Выплатым оформитлаш медорганизаций гыч пашам ыштен кертдыме жапым пеҥгыдемдыше справке, тыгак тунемме тӧнеж гыч очно тунемме шотышто справке кӱлыт, тушто студентке мӱшкыраҥме да азам ыштыме шотышто пособийым налын огыл манын возымо лийшаш.
Пособийым палемдыме шотышто решенийым Россий Социальный фондын Марий Элысе пӧлкаже, йодмаш пурымеке, лу кече жапыште луктеш. Посна случай годым 20 кече марте шуйнен кертеш. Оксам вич паша кече жапыште колтат.
Мӱшкыраҥме да азам ыштыме шотышто пособийым налаш йодмашым 2025 ий 1 сентябрь марте возымо гын, тудым тунемме тӧнеж тӱла.
freepik.com сайт гыч налме фото.