Йошкар-Оласе Перинатальный рӱдерыште мӱшкыран ӱдырамаш-влакын пайремыштым икымше гана эртарыме. Тыгай мероприятий районлаштат лийын.
Ешыште улшо проблемылан тӱткышым ойырымо, мӱшкыран ӱдырамаш-влаклан сай условийым ыштыме шонымаш дене мероприятийым эртарыме.
Перинатальный рӱдер нерген фильмым ончыктымо, азам ышташ кайыме годым ӱдырамашлан пелен мом налаш кӱлмӧ, азам вӱдыштӧ йӱштылтымӧ, йочан шочмо кагазшым электронно ыштыме да моло теме шотышто каласкалыме, тыгодым азам кузе ончымо шотышто мастер-классымат эртарыме.
Марий кугыжаныш филармонийын артистше-влак Светлана Осипова ден Зоя Берникова мероприятийым сӧрастареныт. Марий Элысе Тӱвыра, печать да калык-влакын пашашт шотышто министерстве икшывым вучышо ӱдырамаш-влаклан театрыш, тоштерыш, выставке залыш каяш ӱжмаш билетым ойырен.
Мӱшкыран ӱдырамаш-влакын кечыштым эше вес ий 7 апрельыште да 7 октябрьыште эртараш тӱҥалыт.