Медведево район Ким ялысе «Уна» кудышто мӱкш ончымо пашам вияҥдыме шотышто межрегиональный научно-практический конференций лийын.
Тушко Марий Эл деч посна Чуваш, Татарстан, Пошкырт кундемла гыч мӱкшым ончышо, тӱрлӧ министерстве гыч представитель-влак, вузла, шымлыше институтла гыч шанче пашаеҥ-влак погыненыт.
Мутлан, историй науко кандидат И.А.Андреев марий-влакын мӱкшым ончымо пашан историйже нерген ойлен. М.Шкетан лӱмеш Марий драмтеатын художественный вуйлатышыже В.А.Пектеев (фотошто) «Мӱкш еш – эл стройым чоҥымаште тӱҥ модель» докладым лудын. Марий юмынйӱла ушемым вуйлатыше А.И.Таныгинын «Марий калык – мӱкш калык» шонымашан докладше чылалан пеш келшен. Марий Элысе Мӱкшым ончышо-влакын обществыжым вуйлатышын алмаштышыже В.Ф.Южаков Марий кундемысе мӱкш промысел шотышто анализым ыштен.
«Арнян вӱршерже» лаштыкым И.Александрова, Э.Иманаев, М.Богданова, Э.Терентьева ямдыленыт.
Моло уверым 1-ше октябрьыште лекше газетнан 40 № -ыште лудса.