Ольга ден Александрын палыме лийыме историйышт шкешотан, ойыртемалтше. Таклан огыл ойлат, ӱмыр пелашым але йолташым йӧршеш вучыдымын да шиждымын вашлият.
Икымше вашлиймаш
Кужэҥер ӱдыр Ольган Оршанке педколледжыш тунемаш пурымекыже, ачаж ден аваже тудлан еҥ деч налме сото телефоным налын пуэныт. Телефонын памятьыште ончыкылык пелашыжын телефон номерже аралалтын улмаш. Ик кечын Ольга ты номерыш йыҥгыртен да тудын озаже – Кужэҥер кундем Нурсола ялын качыже Александр Петухов – дене палыме лийын. Икмыняр жап гыч ӱдыр ден каче дискотекыште вашлияш кутырен келшеныт. Ольган ойлымыж почеш, кугурак капан, канде шинчан ошалге рвезе икымше ончалтыш гычак чонжым савырен. Тылеч вара нуно келшаш тӱҥалыныт. Ольга каныш кечылам, каникулым Одывлак ялыште коваж дене эртарен. Александр тудым ужаш куд-шым меҥге тора гыч кудалыштын. 2010 ийыште нуно мужыраҥыныт. Ты ийынак кеҥежым икымше йочашт шочын.
Ял илыш чонлан лишыл
Ольга ден Александрлан ялысе илыш келша. Йырым-йырысе пӱртӱс, яндар юж, кайыкын мурымыжо чоныш ласкалыкым пуртат манын палемдат. Садлан вате-марий самырык-влакын олаште илаш кумылан улмыштым умылен огыт керт.
– У кечым будильникын помыжалтарымыж дене огыл, кайык муро дене вашлият. Тиде огыл мо куан? – молан ялысе илышым ойырен налын улыда манын йодмемлан, вашештыш озавате.
– Мыланем пӱртӱсыштӧ лияш моткоч келша. Шкенан пакчана уло. Тушто тӱрлӧ пакчасаскам куштена. Тыгак мӱкшотарым кучена. Ты сомылым виктараш тӱҥалме шотышто историй тыгайрак. Пелашемын ачаже пакча шеҥгелсе олмапушто мӱкш ешым верештын. Ешым мешакыш поген, эргыжлан пуаш шонен пыштен. Тыге ме мӱкшым ончымо сомыллан пижынна. Ончычшо тудын дене мом ышташ, кузе ончаш пален огынал, вет мыланна тидыже моткоч вучыдымо лийын. Туге гынат суртыштына мӱкш ешланат верым муынна, ончашат тунемынна. Тылеч вара еш-влак ешаралтыныт. Тачылан 20 мӱкш ешым ончена. Пелашем дене коктынак ты сомылым виктарена. Тудын пелен мыят шукылан тунемынам.
Петуховмытын вич гектар мландышт уло. Тушто нуно умдылашудым, фацелийым да моло тӱрлӧ шудым ӱдат. Мланде кумдыкым кугемдаш, мӱкшым ончымо пашам вияҥдаш кугыжаныш деч субсидийым налаш манын, Ольга социальный полышым пуышо рӱдер дене соцконтрактым пеҥгыдемден. Субсидий окса дене нуно мӱйым тулаш, мӱкш-влакым ончымо инвентарьым аралаш вагонкым да ты сомыллан келыштаралтше тӱрлӧ ӱзгарым наледеныт.
Шке пӧрт
Ольга ден Александрын ончыч шке илыме верышт лийын огыл. Нуно тӱрлӧ вере пачерым айлен але ача-аваштын суртыштышт иленыт. Самырык еш семын илыш условийым саемдаш лийме шотышто субсидийым налаш манын, документымат погеныт. Лу ий гыч тудым налыныт. Вате-марийын кокымшо йочашт 2012 ийыште шочын. Икшыве-влак Кужэҥер посёлкысо йочасадыш коштыныт. Шке суртым чоҥымо йодыш Александрым эреак тургыжландарен. Еш оза ончыкылык илышым ялыште ужын, садлан нуно Советский районысо Ӱшнӱр селаште мландым налыныт, пӧртым чоҥаш тӱҥалыныт. Тидлан субсидийым, ава капиталым кучылтыныт. Чоҥымо пашалан 2016 ийыште пижыныт. 2018 ийыште Петуховмытын ешыште кумшо йоча шочын. Тылеч вара нуно у пӧртышкышт илаш кусненыт. Ольга «Акашево» чыве фабрикыште контролёрлан ышта, Александр – Шернур сыр заводышто тырша.
Йоча-влак – ача-аван куанышт
Петуховмыт – шуко шочшан еш. Икшыве-влак дене жапым пырля эртарымылан нимоат огеш шу, маныт. Йоча-влак дене утларакшым жапым пӱртӱсыштӧ эртараш йӧратат. Пырля поҥгым погаш, чодыраш лектын кошташ кумылан улыт. Кугу пайрем-влаклан пырля ямдылалтыт: пӧртым сылнештарат, тамле сийым ямдылат. Каникул годым Йошкар-Олаш толын коштыт. Йоча-шамычлан Йошкар-Оласе Набережныйыште келша.
Кугурак Лиза ӱдырыштлан – 12 ий. Тудо книгам лудаш йӧрата, яра жапыште сӱретлаш кумылан. Шукерте огыл гитар дене шокташ тунемын. Арсений эргыштлан – 10 ий. Тудо футболла модаш, ече дене кошташ йӧрата. Ныл ияш Даша акаж ден изаж деч артист койышыж дене ойыртемалтеш. Икшыве-влак Рушарня школыш коштыт. Тушто нуно церковно-славянский йылмым тунемыт, мурым мурат, почеламутым лудыт, тӱрлӧ мероприятийыш ушнат. Тидыже йоча-шамычын духовный илышыштым саемдаш полша, палемдат ача-ава.
Ты ешын поро кумылан, еҥ-влаклан полшаш ямде улмыштымат палемдаш лиеш. Ӱшнӱр селасе храмым тӱзаташ полшымаште шагал огыл тыршат. Йырым-йырысе кумдыкым эрыктымашке да моло сомылым шукташ полшымашке кумылын ушнат.
Ольга ден Александр ончыкыжымат мӱкшым ончымо сомылым вораҥдараш шонат. Мӱкш ешым ешарен, шукырак мӱйым налнешт. Мӱкшым ончымаш нунын ешын тӱн сомылыштлан, вес семынже еш «брендшыш», савырнен.
Петуховмыт ешын альбомжо гыч налме фото-влак.