1 март гыч мӱкшым ончымо шотышто законышто ала-могай вашталтыш лийын, маныт. Тудо мо дене кылдалтын?
Ю.Петров.
Кужэҥер район.
Марий Эл Республикысе вольык, янлык чер ваштареш кучедалме шотышто станцийын пӧлкажым вуйлатыше Николай Завьялов вашешта:
– У правил-влак почеш, мӱкшотарлаште дезинсекцийым, дезакаризацийым да дератизацийым идалыкыште ик гана деч шуэн огыл, тыгак копшаҥгым, пудийым, грызуным але нунын кышаштым ужмеке ыштыман.
Ондакысе дене таҥастарымаште, у документыште омарта-влакым канде, тул (оранжевый), нарынче, ужар тӱслаш обязательно чиялташ йодмаш уке. Тыгак мӱкш пыжашым ошалге-кӱрен тӱсан сото-влак дене гына лопкаҥдыме шотышто нормым кораҥдыме.
Мӱйым погымо тӱҥ тургым жапыште ветеринар препарат-влакым кучылташ ок лий.
Правилыште мӱк-шым кучымо вер нерген посна возымо. Мӱкшотар шыштым перерабатыватлыше предприятий, кондитерский да химический продукций завод, аэродром, военный полигон, кӱртньыгорно полоса, 110 кВ деч утла напряжениян электропередаче линий, тӱвыра тӧнеж, медицине, образовательный, йоча-влаклан каныме да тазалыкым пеҥгыдемдыме организацийла, соцслужбо, социальный реабилитацийым эртыше ийготыш шудымо йоча-влаклан специализированный учреждений деч 100 метр утла тораште верланышаш.