Республикысе тӱс сымыктыш тоштерыште 16 сентябрьыште Российын сулло сӱретчыже, Марий АССР сымыктышын сулло пашаеҥже – И.М.Ямбердовын выставкыже почылтын. Пагалыме лӱмлӧ айдемылан тиде кечын 65 ий темын. Выставке «Мӱкш тӱня мари» (Свет земного рая) маналтеш. Но ончыктымо сӱретлаште мӱкш гына огеш ончыкталт. «Мый пашаче марий калыкым тӱня кумдыкышто, илыш тӱняште ончыкташ тыршенам», манын умылтара автор.
Иван Михайловичлан Марий Эл вуйлатыше А.Евстифеев саламлымашан серышым колтен, республикысе правительстве вуйлатышын икымше алмаштышыже М.Васютин юбилярын оҥышкыжо И.Петров лӱмеш «Калык верч тыршымылан» медальым пижыктен. Шуко уна дене пырля мастар еҥым родо тукымжат, Катя ден Таня ӱдыржӧ-влакат саламленыт. Танян скрипка дене Марий семым шоктымыж почеш Иван Ямбердов шкежат, уна-влакат кушталтыде чытен огытыл. Видеом ончалаш темлена.
Ӱдыржӧ-влак да уныкаж дене пырля
