Эртыше каныш кечын Медведево район Кугу Шап ялыште «Невозможное возможно» издер конкурсым эртареныт. Тыгай пайрем республикыштына икымше гана лийын.
Конкурсыш ушнышо 15 команде кӱлынак ямдылалтын. Тыге курык гыч «Кин-дза-дза» звездолёт, паровоз, Змей Горыныч, матрёшко, мӱкш омарта, коҥга да моло оҥай издер воленыт. Ончаш толшо-влакат йокрокланен шоген огытыл. Нуно весела сем почеш кушталтеныт, тӱрлӧ оҥай модыш дене модыныт, ватрушко дене мунчалтеныт.
Сеҥыше-влакым вич номинацийыше ойыреныт. Эн ойыртемалтше издерлан (тӱҥ приз) ретропаровозым (мультипликаторщик-влак команде) шотленыт. Эн писе издер – «Кин-дза-дза» звездолёт («Пятый элемент» команде). Ончышо-влакын призышт Крейзи-банан лӱман издерлан («Спортивные качки» команде) логалын. Ситимедовский издер («Ура доктора» команде) «Эн кугу издер» лӱм дене палемдалтын. «Эн оҥай издер презентаций» номинацийыште СССР-ын издерже («Век живи, век веселись» команде) ойыртемалтын. Тыгай конкурсым кажне ийын эртараш палемдыме.
И.Речкинын фотожо-влак.