Эчкевондым (таволга вязолистная) калык медициныште ожнысек кучылтыт. Тудо июнь гыч июль мучаш марте пеледеш. Лач ты жапыште пеледышым погыман. Вуйжым лышташ дене пырля кӱрлын налман. Выньыкымат туддене ыштеныт. Эчкевондо эҥер сер воктене, купан да вӱд налме олыклаште, чодыраште шудан куплаште кушкеш.
Ты кушкыл пӱ-жалтарыше, шондым, шекшым лукшо, уло организмым пеҥгыдемдыше, лыпландарыше йӧн семын пайдале. Склероз, цинга ваштареш кучедалеш, бактерийым пытара.
Эчкевондо нӧшман лемым инсульт деч вара вашкерак тӧрланаш йӱыт. Пел стакан ош аракаш кок изи совла нӧшмым пыштыман, пычкемыш да юалге верыште 14 кече шинчыктыман. Кажне кечын рӱзалтыман. Шӱрыман. Настойкым ик десерт совла дене, вӱд дене варен, кечеш кум гана кочмо годым йӱман. Тыге кум арня эмлалтман. Вара шым кече каналтыман да адак йӱаш лиеш. Настойкым мокш черан еҥ-влаклан йӱаш огыт темле.
Эчкевондо дене пиелонефритым, циститым, пуалмым (отёк), ревматизмым, подагрым, кылмен черланымым, гриппым, герпесым эмлат. Лемым ямдылаш манын, ик стакан шокшо вӱдыш ныл изи совла пеледышым пыштыман, вӱд пар ӱмбалне 25 минут шолтыман, шӱрыман. Лемым ик кугу совла дене кечеш кум гана йӱман.
Эчкевондо пеледышан лемым шӱм чер, тахикардий, нелын шӱлымӧ, вуй корштымо годым чай семын йӱыт: пеллитр шокшо вӱдыш ик кугу совла пеледышым пыштыман, изишак шинчыктыман.
Эчкевондо организм гыч аярымат луктеш, садлан туддене арака дене аяргымым эмлат, кишке чӱҥгалме годымат пайдале. Тидлан ик стакан шокшо вӱдыш кок изи совла коштымо пеледышым пыштыман, 20 минут шинчыктыман да кок кугу совла дене кечеш куд гана йӱман.
Ты лемымак тӱрлӧ сусырым, чӱнчам, кокшам, псориазым, коваште йӱлымым эмлаш кучылтыт. Ӱп сайын кушшо манын, тиде лем дене шӱалташ сай. Геморрой годым клизмым ышташ темлат. Гинекологий чер (азам ыштен кертдыме, эндометриоз, эрозий, молочнице) годым спринцеватлалташ лиеш.
Ожно эчкевондо дене йыжыҥ ревматизмымат эмленыт. Лемым йӱыныт, тыгодымак корштышо верыш эчкевондан да сӧсна але барсук кӧргӧ коян мазьым йыгеныт. Мазьым ямдылаш порошок марте туржмо ик ужаш коштымо пеледышым да вич ужаш коям налман. Коям ондак левыктыман, вара порошок дене варыман.
Эчкевондышто улшо метилсалицилат пуалмым пытара да ырыкта. Мазьым радикулит, остеохондроз, йыжыҥ корштымо годым йыгаш сай. Тыгай годым порошок ден коям але вазелиным икнаре налман да иктеш лугыман.
Эчкевондо пеледыш дене ӱйым ямдылаш лиеш. Тудым температурым волташ, вуй корштымым, радикулитым, остеохондрозым, ревматизмым, йыжыҥ да чогашыл корштымым, кылмен черланымым эмлаш кучылтыт.
50 грамм тыгыдемдыме пеледыш ӱмбак оливке але кушкыл ӱйым пеледышын петырналтмешкыже темыман, лугалтыман. Пычкемыш верыште 14 кече шинчыктыман. Шӱрыман. Ӱйым корштымо верыш йыгаш, массажым ышташ, душлан гельыш ешараш, аромалампыш ешараш лиеш.