Салам лийже, «Кугарня» газет редакций. Ятыр ий ончыч лийше ик ӧрыктарыше случай нерген «Изи тӱня, кугу тӱня…» лаштыкыш мыят возен колтем.
Тунам кугурак эргым 2 ияш лийын, пеш нелын черланен, ангине марте шуын. Кап температуржо 40 градус утлаш кӱзен ыле. Йӱдым эргым кечкыжаш тӱҥалынат, эмым пуэн, пеленем ӧндал пыштенам. Пырля шкежат нералтен колтенам да омым ужынам. Пуйто йочамым теҥыз воктеке поездыш ужатем. Тудо мыйын кок ковам, шкенжын кугезе коваже-влак, дене пырля пуйто канаш кая. А нунышт шукертак коленыт. Поездыш шинчыч, кидем рӱзалтен ужатышым да перрон гыч шонкален ошкылам: «Эргымже кок коваж дене кузе шогаш тӱҥалеш? Нуно вет шоҥго улыт, а эргым пеш чулым, почешыже от шу». Мӧҥгӧ миен пурышымат, авалийшем ойла: «Таня, коват-шамыч эргычым мӧҥгеш кондышт – тудо тый дечет посна чот шорташ тӱҥалын, мӧҥгӧ толмыжо шуын. Садлан пӧртылашышт пернен».
Тидын годым помыжалт каенам да иканаште изи чукаем пӱтырен кученам – пӱжалтмыж дене футболкыжо ночко ыле, температуржо волен, шӱленжат ласкан. Эрдене омем нерген пелашемлан каласкаленам, тудыжо моткоч ӧрын пелештен: «Юмылан тау, мӧҥгеш конденыт».
Татьяна.
Звенигово район.
freepik сайт гыч налме фото.