Лыстанвӱнчын лӱсыжӧ тӱрлӧ витаминлан поян, поснак – аскорбиновый кислоталан да каротинлан.
Кылмен черланенда, кокыреда? Кок изи совла тыгыдемдыме свежа лӱс ӱмбак ик стакан шокшо шӧрым темыза, изи тул ӱмбалне 5-7 минут кучыза, петыртыш дене петырен, эше ик шагат шинчыктыза, шӱрыза. Шокшо настойкым 2-3 кугу совла дене кечеш кок-кум гана кочмо деч пел шагат ончыч йӱза.
Пӱйшыл гыч вӱр йога – лыстанвӱнчӧ кишым пурза.
Чӱнча витара, тӱрвӧ лук шелышталтеш, когаргенда гын, лыстанвӱнчӧ кишым, нарынче шыштым, нӧшмӱйым але кишым, прополисым да кӧргӧ сӧсна коям, икнаре налын, иктеш варыза. Вӱд пар ӱмбалне шолтен налза, сайын лугыза. Вартышым сусыр верлаш йыгыза.
Пагар чер дене орланыме, мел шелме годым лыстанвӱнчӧ кишым 50 мг дене кечеш кум гана кочмо деч ончыч кочса.
Йыжыҥ коршта да пуалеш? Свежа укшан ванныйыште кийыза.
Вий уке, шӱлыш петырна, чӱчкыдын вуй коршта гын, тыгай мӱйым ыштыза. Эмалироватлыме атыш 70-80 ужар пӱгыльмым пыштыза, ик литр вӱдым темыза да ик шагат шолтыза (пӱгыльмӧ вилке ден шуралталтшаш). Леве вартышым шӱрыза. Вара тушко ик кг сакырым пыштыза да тудын шулымешкыже шолтыза. Изишак лимонный кислотам ешарыза. Вартышым пычкемыш юалге верыште петыртыш дене петырен аралыза. Тудым ик кугу совла дене, вӱд дене подылын, кечеш кум гана кочмо деч 30-40 минут ончыч йӱза.