Пеледышыш пурак чот шинчеш, садлан тудым ӱшташ кӱлеш. Мо дене?
Вӱд ден шӧрым икнаре налза, иктеш варыза да туддене лышташлам ӱштса. Тыге лышташ йылгыжаш тӱҥалеш, тыгак кушкылым эҥыремышвот пудий деч арала.
Ик литр вӱдыштӧ ик таблетке янтарный кислотам (аптекыште ужалат) шулыктарыза. Тыгай вӱд кушкылым чер деч арала, сайынрак кушкашыже полша.
Пел литр вӱдыш кок кугу совла спиртым да ик кугу совла глицериным варыза. Ты йӧн лышташым пурак деч сайын эрыкта веле огыл, тыгак изирак сусырым эмлаш полша.
Ик стакан вӱдыштӧ ¼ изи совла лимон кислотам шулыктарыза. Ты вӱд дене лышташым ӱшташ, тудым кушкылыш шыжыкташ лиеш.