4 мартыште марий музык тӱням кугу кӱкшытыш нӧлталше композитор, «Акпатыр» икымше марий оперын авторжо Эрик Никитич Сапаевын шочмыжлан – 90 ий.
Комсомол Марий обкомын Олык Ипай лӱмеш да Марий АССР кугыжаныш премий-влакын лауреатше (нине чап лӱм-влакым колымыж деч вара пуымо), уста семмастар ош тӱняште улыжат 30 утларак ийым гына илен, а шочмо калыкшылан могай шерге поянлыкым коден.
Сем тудын шӱм-чонжо гыч шолын шогышо памаш вӱд семынак чарныде йоргыктен йоген.
Кӱчык ӱмырыштыжӧ Эрик Сапаев оперымат, симфонический ден камерно-инструментальный произведенийламат возен шуктен. А тыглай калык тудым муро-влакын авторжо семын пала да «Снеге пеледеш» (мутшо М.Большаковын), «Молан вуйым кидет ден кучен…» (мутшо Ю.Чавайнын), «Тылат» (мутшо С.Вишневскийын), «Лачак тыйын лӱмеш» (мутшо С.Николаевын) да эше ятыр мурыжым тачат йӧратен мура.
Южгунам мурым колыштат да тудын авторжо-влак нерген утларак пален налаш кумыл лектеш, фотосӱретыштшамычымат ончалме шуэш. Эрик Сапаевын илыш корныжым келгынрак шымлаш шонышо-влаклан Марий Эл Республикын колыштмо-ончымо документ-влак кугыжаныш архивше полшен кертеш.
Тиде архивыште 2017 ий гыч марий композитор Э.Н.Сапаевын фото- ден фонодокументше-влак аралалтыт. Фото-документ-влакым 75-ше номеран описьыш, а фонодокумент-шамычым 14-ше номеран описьлашке пуртымо. Эрик Никитичын 1960-шо ийлаште плёнкыш возен кодымо 19 произведенийжым да 63 фотосӱретшым архивыш эргыже Андрей Эрикович Сапаев конден. Нуным кумылан-влак Колыштмо-ончы-
мо документ-влак кугыжаныш архивышке толын ончен але колышт кертыт.
Э.Н.Сапаевын описьше гыч 18 фотосӱретым архивыш толдеат ончалаш йӧн уло. 2018 ийыште ме, архив пашаеҥ-влак, «Лÿмлӧ еҥ-влакын личный фондышт» («Личные фонды – яркие личности») виртуальный фотоончерым ямдыленна. Тиде ончерым «ГААВД Республики Марий Эл» сайтыштына «Виртуальные выставки» рубрикеш вераҥденна. Фотоончерыш пуртымо индеш еҥ кокла гыч иктыже – Э.Н.Сапаев. Тудын йоча жапысе, студент годсо фотожо-влакым, республикысе моло лÿмлӧ еҥ-влак дене пырля войзалтме фотосÿретше-влакым ужаш лиеш.
Тунемше, туныктышо, студент, журналист-влак, тыгак кӧ икымше марий оперын авторжо, композитор Эрик Сапаев нерген шымлымаш пашам воза, нуно фото-влакым шке пашаштышт кучылт кертыт.
«Кугарня» газетын лудшыжо-шамычланат ончалашышт фотоколлекцийна гыч икмыняржым савыктена.
Анфиса ЭМАНОВА,
вӱдышӧ архивист.