Шыжын кок тылзыжат эртен кайыш. А могай лиеш ноябрь? Теле деч мом вучыман? Тидын нерген Йошкар-Олаште илыше да игечым ятыр ий эскерыше Геннадий Рыбаков ойла:
– Тений сентябрь пытартыш 30 ий жапыште эскерыме деч кокла шот дене 2 градуслан левырак лийын, а октябрь – 1,1 градуслан. 2014 ий деч вара октябрьыште игече левешт толеш. Эн леве – 6,1 градус – 2020 ийыште шоген. Ноябрьыштат игече лывырге лийшаш.
Ноябрьым теле тылзышкат пурташ лиеш, вет тунам лумат толеш. Но кузе лумын шында, тыгак шуленат каен кертеш. Пытартыш 40 ийыште 11 ийыштыже лум 1 декабрь марте шулен пытен. Ноябрьыште 1990, 1992, 1994, 1995, 2007, 2010, 2011, 2016 ийлаште шуко лум лумын.
Ноябрьыште йӱрат йӱреш. Пытартыш 40 ий жапыште лу ийыштыже ноябрь чот йӱран лийын. А теве 1987, 1988, 1993, 2011 ийлаште йӱр йӧршеш йӱрын огыл. Тений лум йӧршанйӱр шуко лийшаш, но лум шагал лумшаш, тудыжат тылзе мучаш марте киен ок шукто.
Шыже ден теле, кеҥеж дене теле кокласе кылым ончалаш гын, тений теле ны чот йӱштӧ, ны чот леве лийшаш огыл але изиш йӱштырак лийын кертеш.