2 мартыште Э.Сапаев лӱмеш Опер да балет академический театрын труппыжо «Большие гастроли» программе почеш Луганскышке каен. Тиде программым илышыш шыҥдараш да корнылан оксам «Росконцерт» кугыжаныш тӱвыра тӧнеж пуэн.
Тусо академический филармонийын сценыштыже театрнан артистше-влак 5 мартыште П.Чайковскийын «Щелкунчик» балетшым кок гана ончыктат. Кайыше-влак (чылаже 32 еҥ) Ростов-на-Дону оласе унагудыш миен пурат, тушеч спектакльым шындаш кудалыт.