Н.Чиванова Киров кундем Пыжанью район Вӱлэҥер ялысе книгагудышто пашам ышта. Ты пашаште Надежда Александровна 2004 ий годсек тырша. Книгагудо Марий тӱвыра рӱдерын оралтыштыже верланен, садлан иктаж-могай пайремлан мероприятийым эртарыме годым пашаеҥ-влак, вийыштым иктеш ушен, пырля ямдылалтыт.
Н.Чиванова ты районысо Сидыр ял гыч марлан толын. Пелашыже Леонид Алексеевич военный лётчик лийын. Чаманен каласыман, тудо илыш дене шукертак чеверласен. Кызыт Павел эргыже ешыж дене Пыжанью посёлкышто ила. Лиза уныкаже коваж дек уналыкеш чӱчкыдын толеш.
– Книгагудышто йокрок ой лий. Ӱдыр-рвезе-влакат школ деч вара толыт, кугыен-шамычат лудаш йӧратат. Калыкым книгагудыш кошташ кумылаҥдаш манын, вашлиймаш, викторине, конкурс-влакым эртарена, кажне гаяк пайремлан погынена. Ялыште илыше ӱдырамаш-влаклан клуб пашам ышта. Кеҥежым шуэнрак вашлийына гын, шыжым да телым чӱчкыдынрак погынена, – манеш Н.Чиванова.
Южгунамже электрон книгам лудаш йӧнанрак гынат, тыглай книгам кучен шичме дене от таҥастаре, тудын пушыжак мом шога. Садлан ида ӧркане, книгагудыш миен толашак тыршыза.
Авторын фотожо.