Кызытсе илышыште самырык-влакын чонлан келшыше сомылым шукташ кумылан улмышт куандара. Шукынжо шкан келшыше пашам виктарат. Моторлык индустрий илышыш кӱлынак шыҥен. Ӱдыр-влак шинчавуным куштат, кӱчым, ӱпым модо почеш чиялтат, самырык годсо моторлыкым арален кодаш манын, косметолог дене тӱрлӧ процедурым ыштат. Чыла тидыже жапым аныклаш полша. Эрдене мален кынелат – мотор улат. Сандене, моторлык индустрий кызытсе илышыште кӱлешан бизнеслан шотлалтеш манын, пеҥгыдын каласаш лиеш. Таче тендам шинчавуныш перманент макияжым ыштыше мастер, наставник Лена Фёдорова дене палдарена.
Шке вержым муын
Морко кундемын шочшыжо – улыжат 25 ий. Школышто тунеммыж годым Лена врач лияш шонен. Кушмо семын стюардессын профессийже келшаш тӱҥалын. Тыге Кокласола лицейын гуманитарный классыштыже шинчымашым поген. Школ деч вара Москосо ик тунемме тӧнежыш экономистлан тунемаш пурен. Ӱдырлан кугу олаште йӧндымын чучын, чон ача-ава дек шупшын. Тыге идалык наре Москошто тунеммеке, ӱдыр, институтым кудалтен, Йошкар-Олашке пӧртылеш. МарГУ-ш экономике сферыште программистлан тунемаш пура. Студент годым тудо айлыме пачерыште илен, тудлан оксам тӱлыман. Адакшым самырык ӱдырын сайын чийымыже, моторлык салонышкат коштмыжо шуын.
Кокымшо курсышто сессий деч вара Лена шинчавуным чиялтыше мастерлан курсышкыжо тунемаш каяш кумылаҥеш. Тидлан аваж деч лу тӱжем теҥгем налеш. Лу тӱжем теҥге ӱдырын ончыкылык илышыжым тӱрыснек вашталта. Лач ты оксалан кӧра тудо кызыт Йошкар-Олаште шинчавуныш перманент макияжым ыштыше ик эн сай мастерлан шотлалтеш.
– 2017 ийыште мыйын тынар оксам лийын огыл, студент улам ыле, сандене авам деч йодынам. Тылеч вара визажистлан курсыш каяш шоненам, но тидлан 100 тӱжем деч шагал огыл окса кӱлын. Тынарже мыйын лийын огыл.
Мастер улмо нерген сертификатым налмеке, ончыч йолташ ӱдыр-влаклан, нунын палымыштлан шинчавуным чиялтенам, коррекцийым ыштенам. Кечывал эрталтымеш тунемынам, вара пашалан пижынам. Клиент-влакым айлыме пачерыште приниматленам. Вузым тунем лекмеке, шкемым ту профессийыште йӧршын ужын омыл. Адакшым шагал огыл клиентым погенам, кидемат лывырген шуктен, – палдарыш Лена. Вара тыгерак ешарыш:
– Мастер семын кушкынам, йол ӱмбалне пеҥгыдын шогенам манаш лиеш. Садлан йолташ ӱдырем дене студийым арендоватленна. Тушто сай ремонтым ыштенна. Илыш ончыко кая, модо тыгак верыште огеш шого. Ты сферыште утларак вияҥаш, тӱрлым шымлаш, курсышто шинчымашем нӧлташ тӱҥалынам. Тидлан Москош, Озаҥыш кудалыштам. Йошкар-Олаштат икмыняр курсым эртенам, тыгак онлайн йӧн дене тунемынам. Кызыт утларакшым шинчавуныш перманент макияжым ыштем, курс-влакым вӱдем.
Лена тыгак наставник семын тырша. Тидыже шукертсек шонен коштмо кугу шонымашыже. Ӱдыр-влаклан курсым эртара, шинчавуным чиялташ туныкта. Тидлан тудо шуко ямдылалтмыж нерген ойлыш. Тылеч ончыч шинчымашем шагал, кутырен ом мошто, еҥым кузе ты сомыллан кумылаҥден кертам манын ӧпкелен. Садлан шкежат ончыч наставник-влак дене пашам ышташ тӱҥалын. Сайын мутланаш, шке сатум калыклан кузе чын темлаш,
шуктымо пашалан эреак кумылаҥмашымым кузе муаш кӱлеш – чыла тунемын. Тылеч вара туныктымо базым ямдылен, методический пособийым келыштарен.
– Икымше туныктымо курсым шукерте огыл эртаренам. Мыланем тудо моткоч келшен, шке верыште улмем, йӧратыме пашам шуктымем эше ик гана пеҥгыдемденам, – мане Л.Фёдорова.
Ӱдыр шке пашаж дене ВКонтакте, инстаграм площадкылаште палдара. Тидын нерген тудо тыгерак каласкалыш:
– Инстаграмым вӱдымӧ шотышто уто нелылыкым ои шиж. Тыште вожылман да лӱдман огыл. Калык ончылно шкем ласкан кучыман, яндар чонан лийман. Пел ий ончыч шке пашам дене палдарыме шотышто инстаграмым чолган вӱдаш тӱҥалынам. Тыге мыйын клиентем-влак ешаралтыч. Тугеже мыйын пашам нунылан келша, уке гын огыт тол ыле.
Лена илыш деч вараш ок код. Таче мо кӱлеш, тудым эреак шымлен шога, модым эскера, шке сомылжым шукташ техникым уэмдаш тырша, курслаште шинчымашыжым чӱчкыдын нӧлта. Каласыман, тудын шӱжарже ден изажат шке сомылым шуктат. Катя шӱжарже – причёскым ыштыше стилист, Павел изажын натяжной тувырашымым ыштыме фирмыже уло.