Перепись
26 октябрьыште Марий Эл Правительствыште Переписьым ямдылыме да эртарыме шотышто комиссийын черетан заседанийыштыже переписьын лу кечыжым иктешленыт.
Маристат управленийым вуйлатыме сомылым жаплан шуктышо И.П.Петрован мутшо почеш, 24 октябрьлан республикыштына 34,8 процент еҥ (тиде 237 тӱжем лиеш) переписьысе йодыш-влаклан вашештен. Кызытеш эн чолган Параньга районышто (75% еҥ возалтын) пашам ыштат; Марий Турек районышто – 60% еҥ, У Торъял районышто – 58,6%, Килемар районышто – 57,9% еҥ. Медведево районышто 16,3% еҥ гына переписьыш ушнен, Кужэҥер районышто – 23,2%, Йошкар-Олаште – 25,7%.
Эн кугу чаракым тидлан коронавирус инфекцийын шарлымыже ыштен. Тидлан кӧра еҥ-влак шке пачер омсаштым огыт поч, пӧртышкышт огыт пурто. А стационарыш (а тиде тунемме вер, книгагудо, тӱвыра пӧрт) каяш огыт вашке, да тушкыжат 22 октябрь гыч QR-код дене гына пуртат.
Теве Козьмодемьянскыште ик переписчикым пий пурын пытарен. Советский районыштат переписчик ӱмбаке пий кержалтын, йӧра, еҥ-влак туддеч утлаш полшеныт.
Тыгак переписьыш ушнышо ик еҥ черланен. Тыге ынже лий манын, контролёр ден переписчик-влак кажне арнян ПЦР тестым сдатлышаш улыт. Но кодшо арняште 1443 пашаеҥ гыч улыжат 775 еҥ веле тидым ыштен. Ынде нунылан шуматкече еда тестым ышташ кӱштымӧ.