Ты уремын историйже 1946 ийыште тӱҥалтышым налеш. «Искра» озанлыкын пасуштыжо посна илем-влакым чоҥаш мландым ойыреныт да у уремлан икымше руш учёный Михаил Васильевич Ломоносовын лӱмжым пуаш палемденыт. Тыгаяк шонымаш дене Йошкар-Олаште Грибоедов, Ватутин, Тимирзяев да моло урем-влак шочыт. Нуным оласе промышленный предприятий-влак воктене негызлат. Тидыжым пашазе-шамычлан паша верыш вашке миен шуаш йӧнан лийже шонымаш дене ыштат.
1970-ше ийлаште Йошкар-Оласе Механический заводын кумдыкшым кугемдыме амал дене ты урем дене коштмо (кудалыштме) корным петырат, а 1980-ше ийлаште «Торгмаш» заводын кумдыкшым шарат да урем дене эртен коштмо вес ужашыжым петырат. Тидлан кӧра Карл Маркс (ты урем дене ушнымаште тӱҥалеш) урем могыр гыч Ломоносов уремыш пурымо корно тупикыш савырна. Садлан ты урем верын-верын шуйна. Ломоносов урем Бауман урем тӱҥалтыште мучашлалтеш. Нуным икте весе деч Йошкар-Ола — Яраҥ кӱртньыгорно корным вончымаш ойыра. 1953 ийыште Йошкар-Оласе Совет исполкомын пунчалже почеш Ломоносов уремын кок меҥге кужытышто чоҥымо пӧрт-влакын адресыштым Бауман уремыш кусарыме.